Nagaland-ah police nen tanghova venhim hna thawktuten beihpui an thlakna hrang hrangah Nikki Sumi hel pawl, NSCN (K) leh NSCN (IM)-a tel mi pasarih leh khawtuala an tana thawktu mi pali an man.
Nikki Sumi pawla mi khawtuala thawktu an mante hi Thilixu khuaa Nilainia an man an ni a. NSCN (IM) pawla mite hi Thawhlehnia Burma Camp huam chhunga an man an ni ve thung.
Venhim hna thawktute hian an thudawn bawhzuia a huhova thawk chhuakin heng mite hi an man a, National Highway leh a chhehvelah mi pawisa chhuhsak thin an ni a. Khawtuala an tana thawk thinte pawh hi dan lova an tana ei leh in lo siamsak thin nia puh an ni.
An mi mante kut atang hian .32 pistol pathum leh a magazine, .32 mu 25 leh lehkha pawimawh dang an mansak bawk.
An thil lo kawlte nen hian Diphupar police station-ah lak vek an ni.
Burma Camp chhehvel atanga an man, NSCN (IM) mi hi ralthuam leh a mu pe chhawng kual thin nia hriat a ni a. .22 pistol pakhat leh .22 mu pathum a lo kawl.
Ani hi East police station-ah hren a ni ve thung tih sorkar thuchhuah chuan a tar lang.