- F. Vanlalrochana
JACK CANFIELD-A LEH MIPA NAUPANG BASEBALL KHEL
Chicken Soup for The Soul hi bu hrang hrang a awm tawh a. Khawvela lehkhabu hmingthang ber ber leh hralh tla ber ber an ni hlawm. Jack Canfield leh Mark Victor Hansen te buatsaih a ni. Chicken Soup for The Soul hi bu hrang hrang 250 chuang hi tawng chi 40-a tih chhuah a ni tawh a, a copy an chhut zat ngawt pawh copy maktaduai 500 a tling a ni.
Jack Canfield-a hi a hnathawhna atanga a haw hian, tumkhat chu an inbul lawk park-a (Baseball khelhna hmun hi park an ti a. Diamond emaw ballpark an ti bawk) naupangin baseball (little league baseball) an khel lai hi a en a.
Field sir a thutthlenga thu chuan a en ve ta a. Naupang pakhat hnenah chuan, “score dinhmun engnge ni tawh?” Tia a han zawh chuan, “14-0 a ni mek e. Lehlam hian 14 an score tawh” a ti a.
Jack Canfield-a chuan, “In score a inthlauh tehlul nen, i phur loh hmel chuang loh hle mai” a tih chuan, naupang chuan, “Phurloh a? Engnge kan phur loh ngawt ang? Kan la vaw ve reng reng hlei nem?” A ti ta a.
Keini chu, kan chungah eng thil emaw a lo thleng a, eng harsatna emaw te kan han tawk a. Tan kan lak ve hma, tha kan thawh ve hma hauhte hian, kan beidawng a, kan hnual a, kan tha a zawi nghal ringawt mai thin.
“E khai! Tan kan la khawh ve reng reng hlei nem mawle” tih rilru hi i pu ang u.
DENZEL WASHINGTON-A LEH A RIN PATHIAN CHU
Movie Star lar Denzel Washington-a hian chanchin ngaihnawm tak tak a nei a. Lemchang thiam ropui berte zinga chhiar tel a ni a. A channa film lah a hmuhnawm hlawm!
Pastor fapa a ni a. A naupan lai hun tha tam zawk pawh Kohhran huang chhungah a hmang a ni.Chutiang chu ni mah sela, a han rawlthar chhuak chho chu rinna lamah a hnungtawlh ta a. Lalpa lak ata a lo hla ta a. A rinna a ringhlel a. Pathian thiltihtheihna chungchangah pawh zawhna a ngah ta hle.
Kum 14 a nihin a nu leh pa an inthen hlauh mai a. Thian sual a kawp a. A nunah harsatna a tawk chho ta a. A nun uluk takin a chhut kir a. Tleirawl nun harsa tak a hmanna karah Pathian khawngaihna a hmu thiam thar leh a. Lalpa lamah a kir leh ta a. Vawikhat mah a peng tawh lo.
Harsatna karah Lal Isua rualin a kal ta hram hram zel a. Chungte chu chhuang takin a puangchhuak ta zel a ni. Engkimah Pathian hnenah a lawm a. A hlawhtlinna zawng zawng pawh chu Pathian hnen atanga a hmuh a nih thu a sawi thin. “A laka rinna ka hloh lai pawh khan, Ani chuan ka lakah rinna a lo hloh ngai hauh lo” tiin a sawi thin a ni.
Sual kawng zawh thuiloa chhanchhuahna a chang chu a lawm zia thu a sawi fo! A tleirawl chhuah tirha a kawm ho kha, tan inah kum 40 te an tang hlawm. A vannei ve bawk reng a. Lalpa khawngaihna avang a ni tih a chian avangin a sawifo nghe nghe.
1983 khan nupui a nei a. Fa pali neiin, vawiin thlengin nupa hlim tak an la ni. Hollywood nupa tam tak hi chu inthen leh an sam a ni. Amaha nung tlat Lal Isua avangin chhungkaw duhawm tak a dinin a kaihhruai zui zel thei a ni!
Denzel Washington-a hi Dec 28, 1954 khan a lo piang a. Fordham University atangin BA in Drama and Journalism a zir zo a. Lemchanna lamah a inhmang chho ta a. Oscar Award pawh hi tum hnih a dawng ta a. Courage under Fire, crimson tide, Glory, Malcom X, Philadelphia, The Hurricane, The Bone Collector, Remember The Titans, Training Day, etc hi a movie channa hoah chuan kan hriat lar pawl a ni awm e.
Zu in a sim a. A phak ang tawkin Pathian thuchah a puang thin a. A remchanna lai apiangah Lal Isua tlanna thute a sawi hram hram thin a ni. November ni 22, 2017-a an interview naah pawh…”Tunlai khawvel, beng ti za thei thil tam tak awm tawhna hmunah hi chuan Kan sualte tlanna atan Lal Isua a thi tihte hi rin mai a har thin. Hriat chu hre tawh mah ila. Kan theihnghilh leh thin” a ti a ni.
Denzel-a nun atanga kan zirturte:
- Khawvel mi lar hrang hrangah hian Piangthara Lal Isua pawmtu an awm tam a. Mizote pawhin an chanchin kan hre fo. Heng an chanchin kan sawifo tam tak hi, Chhuanawm viau mah se, Ringtu tihawm loh tak lo tih leh nulh hi an nei thin. Mihring hi famkim hauh lo mah ila, khawvel mite tih ang sual langsar leh thildanga kan hming sawizawm a nih leh thin chuan a fuh theilo. Chutiang lakah chuan Denzel Washington hi a fihlim viau a ni.
- Engtiklai pawh Pathian a dah pawimawh ber a. Lal Isua a zahpui ngailo. Pathian thu sawi tura an beiseilohna hmunah pawh a zep tel fo. “Pathian hi dah pawimawh ber ang che u” tiin mi dangte a fuih thin. Dillard University zirlaite kianga a thusawinaah pawh a sawi nghe nghe a ni.
- Kristian chhungkaw tha a din. Hollywood star dang tam tak ang lo takin kawppuite lakah rinawm lohna sawi tur a nei lo bawk.
- Rinnain a nung a. A nun kaihhruaitu lian ber chu a Pathian rinna a ni.
- A chapo lo bawk. Chapona hi sual lian zawka min hnuklut theitu a ni a. Pathian khawngaihna nen chapona a hneh thin.
- Ni tin Bible chhiarin a tawngtai thin. Thlarau pawlna changin hlim harhna pawhin a lo khawih ve tawh hial a ni.
I NGAIHTUAH NGAILOH GF HANDELA CHANCHIN PAHNIH
GF Handela hming hi mizo kristiante pawhin kan hre deuh vek ang. Halleluiah Chorus phuahtu tih pawh kan hre, a sa ve tawh ban phar tur pawh nise kan phar thei fur ang. A chanchin engemaw zah kan hria anga. Hriat loh kan nei teuh bawk ang.
A chanchin thenkhat, kan ngaihtuah lutuk loh lam han hrut zuai ila.
- Lehkha chhiar zau mi a ni: Lehkha chhiar zau tak mai a ni a. A hunlaia literature tha, thu leh hla ziak thiam ropuitr thuziak kha a chhiar nasa. A lehkha chhiar behchhanin hla pawh a phuah nual nghe nghe. A bikin, John Milton-a kutchhuakte a ngaina zual.
Milton-a Lemchan thawnthu, ‘Samson Agonites’ behchhan khan oratorio pakhat Samson tih kha a siam a. Hla pakhat “L’ Allegro ed il penseroso’ kha Miltona kutchhuak atanga a siam a ni bawk a. French lemchan thawnthu ziakthiam Jean Recine behchhanin Esther tih leh Deborah leh Athalia a siam bawk a ni.
Thusawi mi kan ni emaw, Hla siamtu kan ni emaw, literature tha, thuziak tha kan chhiar a tul.
- Inkhawm taima: Handela kha inkhawm taima em em mai a ni. A inkhawmna thin St. George’s biak in pawh tun thlengin a la ding a ni.
A mit a lo del hnu phei chuan rual a pawl mumal tawh lo a. Inkhawm ngawr ngawr kha a tuipui chho ta a ni an ti.
Keini chu kan ropui deuh deuh a. Inkhawm kan ngaihtuah lo telh telh thin a. GF Handela chu inkhawm tuipui em emin Lal Isua hnenah a haw leh ta a ni.