Tottenham Hotspur chuan Everton star Richarlison chu lakluh tumin hma an la tan dawn a, Merseyside khaw club hnenah hian lei dilna an thehlut thuai dawn.
North London team hian kum 25 mi ngaihven hian a agent nen inbiakna mumal takin an neihpui dawn bawk.
Richarlison hian kum li hun a lo hman tawhna Goodison Park chu tun nipuiah a chhuahsan ngei dawn a ang sawt hle a, Manchester United, Real Madrid leh Bayern Munich te nen pawh sawizawm a ni tawh.
Richarlison hi tunah Brazil-ah chawlh hmangin a awm mek a, chawlh a hman zawhah a hmalam hun hi chinfel thuai a duh nia sawi niin Antonio Conte-a team hian season tharah UEFA Champions League an khelh dawn avangin a tan zawm a chakawm dawn niin an ngai.
Everton hian a man zata an beisei hi puanzar la ni lem lo mahse team lian zawk pan a duh tih chu an hria.
Kum 2018 a Brazilian club Fluminense atanga England pantu hian kum 2019 khan Everton hi a zawm a, an tan vawi 152 inkhel tawhin goal 53 a khung tawh.