Tripura-a BJP thawhpui, Indigenous People Front of Tripura (IPFT) party hruaitute chuan Nilaini zan khan New Delhi-ah saffron party president JP Nadda an hmu.
IPFT hruaitute chuan BJP national president Nadda an hmuh hi Tripura lama thawhhona nghet zawk an neih zelna tur lam hawi a ni a. A bikin tribal chen tamna laiah saffron party nena nghet zawka thawh dun an duh.
IPFT aiawha Delhi-a kal hi mi pali an ni a, Tripura Tribal Welfare Minister Mevar Kumar Jamatia chuan hovin Nadda hi a chenna inah an hmu a, memorandum an thehlut nghal bawk.
IPFT aiawhte nen hian Nadda hi minute 45 chhung vel an inkawm a, Ministry of Home Affairs (MHA)-in kum 2018-a High-Power Modality Committee a din chungchangte an sawipui.
Hei bakah hian 125th Constitutional Amendment Bill chu pass-a Tripura Tribal Areas Autonomous District Council (TTAADC) hnena thuneihna tam zawk pek chungchang te, Tripura Territorial Council siam te, Kokborok tawng pawm chungchang te, department hrang hranga Scheduled Tribe leh Scheduled Caste tana hauh hna ruak hnawh khat tura Special Recruitment Drive neihte an sawipui bawk.
Tripura-a BJP sorkara tel ve mek, IPFT hruaituten Nadda an hmuh hi an state chhunga BJP buai lai tak a ni a. Tun hnaiah hian BJP hruaitu lawk tak tak lungawi loten Trinamool Congress (TMC) zawm an tum tih thawm a awm a. West Bengal assembly inthlana an chak hnuah khan an lam an âwn nia sawi a ni.