Ukrainian sipaite chu Severodonetsk atanga inthiar chhuak tura tih an ni tih helai bial sorkar hotu lian chuan a sawi.
Khawchhak lam khawpui hi nasa takin bomb a ni a, Russian sipaite chuan region pum thunun tumin an bei.
Ukrainian sipaite an inhnuh kir chuan Luhansk region-ah hian Lysychansk khawpui tih loh chu Russian thununna hnuaiah a awm vek dawn tihna a ni.
Russian sipaite chuan Severodonetsk hi tun hnaiah an hual vek tawh a, a bul chiaha awm, Lysychansk pawh an hual tel.
Luhansk regional head Serhiy Haidai chuan, “Laipuia thla tam kah a nih tawh avangin thil mumal a tih theih loh,” tiin Ukrainian television a hrilh.
“Ukrainian sipaite hian hmun thar lama insawn tura thupek an dawng a, he hmun atang hian beihpui an thlak zel ang,” a ti.
Severodonetsk district head Roman Vlasenko chuan Ukrainian sipaite hi khawpuiah an la awm reng tih Zirtawpni khan Radio Liberty hnenah a sawi a, inhnukdawk fel tur hian hun a duh deuh ang.
Luhansk hi Ukraine khawchhak lama Russian tawng hmang awmna bial niin President Vladimir Putin-a’n thunun tuma a ngaih pawimawh ber pakhat a ni.
Donetsk region nen hian a sawi kawp nan Donbas tih hman mai thin a ni a, hmun zau tak niin industry awmna hmun niin Russian-ten an pui inlak hran tum pawlten kum 2014 atanga lak hran tuma an beih ngar ngar a ni.
Putin-a hian Donbas-a Russian tawng hmangte hi suat tuartute niin a sawi a; mahse, hei hi a dik lo va. He a puhna hi Ukraine a rûn chhan lian tak a ni tel.
Ukraine pawhin Moscow hi Ukrainian-te bomb leh laipui hmangin nasa taka beiin pawisawi lo an suat nasa niin a sawi.
Zirtawpnia thil thleng dangah Russia chuan chhim lama an awp mek, Kherson khawpuia thuneitu tura an tih chu car-a a chuan lai beih niin a thi tih Russian news agency-te chuan an tar lang.
Heng lai hmunah hian Ukraine hian hma lam an pan leh mek a, beihna thleng chungchangah hian engmah thuchhuah an la nei lo.
Kherson region-ah hian Kremlin-in thuneitu atana a ruatten beih an tawk nasa hle a. Heng lai hmun hi Moscow chuan Russia leh Ukraine chhim lam, kum 2014 atanga Russia-in a awp, Crimea inkalpawhna remchang atana an hman a ni.
Russia-in khawpui tichhe nasa
Severodonetsk khawpui hi Russia-in nasa taka an beih tawh avangin thil dingte chu a chhe deuh vek tawh a, in ding 90% chu laipuia kah niin 80% chu a chhe nasa hle.
Civil mi pawh eng emaw zat an la awm nual a, thenkhat chu Azot chemical plant-ah an tawm a, indo hma kha chuan mi 1,00,000 vel an cheng thin.
Ningani khan Russian sipaite hian hmun lak belhin Severodonetsk chhim lam leh Lysychansk hmun thenkhat an la leh nual a, hei hian Ukrainian sipaite hual chep lehzual an nih a hlauhawm hle.
Haidai-a erawh chuan Lysychansk khawpui hi Russian sipaite tan ‘awlsam taka lak a harsa dawn’ niin a la sawi a. Khawpui hi tlanga awm a ni a, venghimtute tan tanhmun a tha hle niin a sawi a ni.
Lysychansk-ah hian kawngpui leh leite tihchhiat deuh vek ni tawh mah se civil mi tam tak thiar chhuah an ni tawh a, thiar chhuah mek zel an ni bawk tih Haidai-a hian a sawi a, khawpui dangah sawn an ni thin tih a sawi.