COVID-19 vaccine chuan kum 2021 khan India-ah nunna nuai 42 chuang a hum niin The Lancet Infectious Diseases chanchinbua zir chianna chhuahah tar lan a ni.
Khawvel puma mathematical modelling study neihah vaccine hian khawvel pumah mi maktaduai 20 vel nunna a hum niin an tar lang.
Invenna pek kum khatnaah khan mi maktaduai 19.8 vel nunna hum a ni a, awm lo sela chuan Covid avangin mi maktaduai 31.4 zet thi tur anga chhut a ni.
He zirchianna hi ram 185-a thi chhinchhiah aia tam thi awm anga chhutna atanga chhut a nih thu zirchiangtute chuan an sawi.
Zirchianna chuan World Health Organisation-in kum 2021 kum tawpah ram tina mi cheng 40% tal invenna pek hman a tum chu tihhlawhtlin ni phei sela chuan nunna 5,99,300 chhan a nih theih tur thu hmuh a ni.
Zirchiannaah hian invenna pek tan atanga kum khat, December 8, 2020 leh December 8, 2021 inkara thil thleng behchhanin an chhut a ni.
“India-ah hian hetih chhung hian invenna avangin mi 42,10,000 vel nunna hum a ni a. Hei hi kan chhut dan a ni a, mi 36,65,000 atanga 43,70,000 inkar vel a ni tihna a ni,” tiin zirchiannaa an thil hmuh ziaktu, Oliver Watson chuan a sawi a. Ani hi Imperial College London, UK-a mi a ni.
India-ah hian hripui a len atangin mi 51,60,000 (48,24,000-56,29,000) vel thi tur anga chhut a ni a, hei hi tuna sorkarin thi a chhinchhiah, mi 5,24,941 aia a let 10 vel zeta tam a ni.