Wales captain Gareth Bale chu contract a hman zawh dawn avangin tunhnaiah a inkhelhna leh chungchangah zawhna a tam hle a. Europe a club tha te pawhin la ngaihven tho mahse United States lam a pan dawn.
Kum 32 mi Bale hian Major League Soccer team Los Angeles FC chu free transfer in a zawm ang.
Real Madrid tana kum kua a khelh hnuah Bale hian tun nipuiah Spain a chhuahsan dawn a, a club thar tur hi Inrinni zan khan amahin social media kaltlangin a puang.
LAFC hi kum 2018 a MLS a ding tan an ni a, kum 2019 khan regular season-ah league record nei tha ber an ni a. Nikumah erawh MLS Playoffs an khelh phak loh hnuah team an inthuam tha a. Thla hmasa khan Italy defender ropui Giorgio Chiellini chu an lakluh tur thu a chiang tawh.
Bale-a hma hun tur inrinsiakna a nasa hman hle a, an ram club Cardiff City chu a zawm mai dawn nia ngaihna a tam hman a, inbiakna pawh an nei thui.
Mahse LAFC an inlan hnuah Los Angeles lam pan a thlang zawk a, MLS regular season hi February atanga October chhunga khelh a ni a, season laihawl a transfer window inhawn hun July 7-ah a club thar hi a zawm ang.
Tun dinhmunah LAFC hi Western Conference-ah hmahruaitu an ni mek a, regular season match 19 khelh an la hmabak.
Bale hian Euro maktaduai 100 a Real Madrid a zawm hnuah an tan match 258 khelin goal 106 a khung bakah assist vawi 67 a nei.