Aizawl: MZP Headquarters Saitual chuan MBSE leh Mizoram University-in kum 2022 HSLC, HSSLC, BA result a tihchhuah taka zirlai ti tha chawimawina hun, Govt. Saitual College Auditorium-ah an hmang a, Agriculture Minister C.Lalrinsanga chu khuallian a ni.
Khuallian chuan MZP Sub Hqrs Lungleiah hruaitu hmasa berte zingah tel tawhin MZP-ah pawh a mikhual lo hle tih a sawi a. Hruaitu hna an chelh laia chawimawina an pekte zingah mi hlawhtling leh entawn tlak tak tak an awm tawh thu a sawi bawk.
Zirlai a nih lai sawi langin, “Pathian thu hi ka awih zo lo a; amaherawhchu, a hnenah ka tlu lut tawp thin,” tiin zirlaite chu Pathian leh kan ram tan tih ngaihtuahna nen lehkha zir turin a fuih a ni.
“District in nih hnu hian Saitual hming pawh a lian tel a, khaw bil ringawt a kawk tawh lo, Pathian tih tlat chunga zirnaa in kal a nih chuan Saitual atang hian mi ropui in chhuak zel ang,” a ti.
Sorkar hnaa luhna hun hi ala awm zel dawn a, amaherawhchu thiam bik nih a ngai thung a, tehna hrang hrang awmah thiam leh zual nih a ngai tawh a, sorkar hnathawh chu a that rualin an ngaihtuahnaah kut themthiam, intodelhna lam hawi ngai pawimawh tel turin a chah a ni.
Nu leh pate pawhin zirlaite hian a lo thlawnin an zir lo va, investment a ni zawk tih an hriatthiam a pawimawh thu uar takin a sawi a ni.
He hunah hian zirlai 126-te hnenah chawimawina thilpek hlan an ni a, DC VL Hruaizela Khiangte leh SP J Lalmuankima te bakah sawm bikten an an telpui a ni.
Hun hi C.Lalrinchhana, Vice President-in kaihruaiin Rev. Joseph Lalrammuana’n hunserh a hmang a, Henry VL Nunpuia, Secretary-in report a pe a, PC Lalthansanga, President leh VL Kroshnehzova, Ex MZP Gen.Hqrs President pawhin fuihna thu sawiin Lalrinkimi, Fin. Secy-in lawmthu sawiin hun a khar a ni.