NABARD sum hmanga sak, Bilkhawthlira Primary Health Centre chu nimin khan Health Minister Dr R Lalthangliana’n a hawng.
Hawnna inkhawmah thu sawiin Dr R Lalthangliana hian Serlui Assembly constituency chu Mizoram luhkapui a nih angin hriselna kawngah hmanrua leh thawktute pawh tihchangtlun zel a pawimawh thu a sawi a. Serlui biala health sub-centre awm zawng zawngte chu Health & Wellness Centre-ah hlan kai vek tawh a nih thu sawiin, Vairengte Community Health Centre pawh tihchangtlun zel tum a nih thu a sawi.
Dr. R.Lalthangliana chuan mipui hrisel zawk nan health department chu tha lehzual a thawm that a nih mek thu sawiin, Kalyakalp hnuaiah hospital, CHC leh PHC chu faina leh thianghlimna kawngah inelna an buatsaih thin thu a sawi a. Faina mai piah lamah mahni bial chhung theuha mipuite hriselna enkawl kawnga hnathawk tha pawh endika lawmmante buatsaih a nih theih nan ruahmanna a awm thu a sawi bawk.
Bialtu MLA Lalrinsanga Ralte pawhin thu sawiin, Serlui assembly bial chhunga health clinic hawn tharahte mipui hriselna endik hna chak zawk a kalpui a nih theih nan MLA find hmanga mi pasarih chhawr mek a nih thu a sawi a. Mizoram luhkapui awmna leh state thenawmte nena inrina thui tak awmna, Serlui bial chu kawng engkima thawm that a pawimawh thu sawiin, PHC, Bilkhawthlir thar hawn a ni ta chu lawmawm a tih thu a sawi.
He huna tar lan a nih danin Bilkhawthlir Primary Health Centre hi NABARD hnuaia sum Rs. nuai 225.58 hmang a sak a ni a, a sak hna hi Zozam Engineering Construction & Consultancy, Aizawlin an thawk a. September 9, 2020-a sak tan niin November 23, 2021 khan sak zawh a ni.
Kawng ânah hian X-Ray room, casualty, pharmacy, laboratory, OPD, office leh operation theatre a awm a, chhawng khatnaah hian labour room, induction, male & female Ward leh nursing station-a awm bawk.