Aizawl: Mizoram Pradesh Youth Congress Committee (MPYCC) chuan nimin khan Mizoramin remna leh muanna a neih theihna atana hma latu, Lal Thanhawla, chief minister hlui leh Congress president hlui an chawimawi.
Congress Bhavan-a chawimawina hun hmanah Lal Thanhawla hian Mizoram buai tan dan leh thil thlen dante sawiin, “Zanlai dar 12-a inkah tan tura engkim ruahman fel vek a nih tawh laiin, MNF President Pu Laldenga berin inkah hma lawk, zan dar 11 velah thulh leh mai a duh thu a sawi a. Mahse, Sangau leh Tuipang lamte hrilh theih a nih tawh loh avangin loh theih lohin inkahna a thleng ta a, ram a buai zui ta,” a ti.
India sorkar leh MNF-in inremna an ziah laia chief minister, Lal Thanhawla chuan remna leh muanna a awm theih nan lalna kiantu neih a ngai a, a hmaa inremna lo siam tawhte pawh kiantu an awm theih loh vanga hlawhtling thei lo a nih avangin, lal thutthleng an kian ta tih a sawi.
Remna leh muanna a awm dawn tih a chian hnuah thangthat lak tum an tam thu leh, amah ngei pawh bâng duh tak tak lo ang hiala puh a nih thu a sawi.
London atanga MNF President Laldenga koh haw an tum chungchang sawiin, “Ko haw tur khan Pu Lalduhoma kha passport nei remchang a nih avanga tir kan ni a, Indira Gandhi tirh a ni lo. Lal Thanhawla te, CL Ruala te leh Congress party hruaitute tirh a ni. Return ticket nen lama kan pek bakah pocket money cheng sing thum nge sing nga ka chiang ta lo, kan pe bawk,” a ti.
Lal Thanhawla hian MNF party-in hnam martarte a ngaihsak loh thu sawiin, Mizoramin remna leh muanna a neih hnu kum 11-ah pawh chhawmdawl emaw, an puala hmalakna a nei miah lo tih a sawi a. Congress party chuan June 27, 1997 khan CTI Sesawngah martarte pualin lung an phun thu a sawi.