‘A nuam awm vei’ hla atanga Zofate hmelhriat, Zo rilrem hla sa thiam tak Lalengmawia (Maenga) chu nimin chawhnu dar 1:35 khan Civil hospital, Aizawl-ah cancer vangin a thi.
Kum 46 mi, Maenga hi vawiin chhun dar 12-ah an chenna, Zonuam Veng, Aizawl-ah vui a ni dawn a. Mizo zaimi inzawmkhawm (MZI) chuan an member Maenga hi hla hmangin an thlah ang.
Kum 2008, October ni 1-ah 3rd India Reserve Battallion-ah lutin, Mangaldai, Assam-a a awm laiin lei (tongue) cancer-in a tlakbuak a, engemawchen enkawl a nih hnuah nimin khan chatuan ram a pan ta a ni.
Zo lunglen hla lam sa thiam tak niin, ‘rap’ lamah pawh a mikhual lo hle a. A hla hit ‘A Nuam Awm Vei’ leh ‘Seat Kan Chang Lo’ te bakah ‘Ka Haw Mai Dawn Lo’ te, Laltanpuia (Sialsuk) phuah ‘Aw Sialkhawpui (I am dun ang)’ tih hla te, ‘Thal Favang Kawl Eng’ te, ‘High Sikul Run’ te, Lalramnghinglova hla hit ‘Tu Zun Zam Nge’ te ‘Ka Pa, Ka Pa Lo Haw Leh Rawh’ tih te leh hla dang tam tak a sak te chuan khawvel hmun hrang hranga Zofate ngainat a hlawh hle bawk.