Russia chuan Ukraine nena an inrina bul lawka awm, Belgorod khawpuia thil puaka mi pathum thihna thleng chu an thenawm ram tihah an puh.
Regional governor chuan thil puak hian mihring chenna in tam tak a khawih a, hei vang hian van sang lama invenna pawh tihnun a ni tih a sawi.
Kremlin chuan Pathiannia beihna an tawh hi Ukrainian sipaiten civil mite beih an tumna pakhat niin a sawi.
Ukraine erawh chuan an puhna hi phain Russian-te chu tun hmaa hetiang thil thleng tawh thinah pawh dawt an lo sawi fo tawh thin niin an sawi.
Mi 3,70,000 vel chenna, Belgorod khawpui hi Ukraine khawpui pahnihna, Kharkiv hmar lam chiaha awm niin Moscow-in February thla tawp atanga Ukraine a run hnuah beihna a thleng fo.
Tun tuma thil thleng leh hi Pathianni zing hma taka thleng kha a ni.
Russian defence ministry thupuangtu, Igor Konashenkov chuan van sang lam invenna hmangin Ukrainian Tochka-U ballistic missile pathum an tihchhiat ve nghal thu a puang.
“Tun tuma min beihna hi ruahmanna fel tak siam niin civil mite awmna lai tak tum a ni,” a ti.
Ukrainian defence ministry thupuangtu, Yuriy Sak chuan a hmain an security service-ten Russian-te phone-a an inbiakna an lo hriat ruk fo tawh thin thu leh tun tuma thil thleng ang hi boruak siam nan an ram chhunga an thlentir thin thu BBC hnenah a lo hrilh tawh.
Ukrainian thuneitu sang pakhat, Serhiy Bratchuk pawhin Belgorod-a apartment block kah fuhna hi Russian Pantsir anti-aircraft system hmanga beihna a nih thu a sawi a, hetiang hi Ukraine-in a nei ve lo niin a sawi bawk.
April thla tir khan Russia chuan Ukrainian helicopter pahnih hmangin Belgorod daiha civil mite tuialhthei dah khawlna an beih thu leh nasa taka kangmei a chhuah thu an lo sawi tawh.
He thil thleng video-ah chuan missile-in oil depot chu kah a ni a. Ukrainian sipaite chuan an inhnamhnawih loh thu an sawi.