India-in High Commissioner to Bangladesh atana a ruat thar, Vikram Doraiswami chuan Inrinni khan Tripura Governor Ramesh Baish leh Chief Minister Manik Saha a kawm.
Governor leh chief minister a kawmnaah hian Doraiswami chuan thenawm ram, Bangladesh nena inkaihhnawih thil hrang hrang a sawipui.
Doraiswami hian Bangladesh-a India palai, Riva Ganguly Das chu a thlak a, India-Bangladesh inkalpawhna tur, km 12.23-a sei tur relkawng siam mek, Agartala bula mi chu a tlawh bawk.
Ram palai nena an inkawm zawhah Tripura Chief Minister Saha chuan Doraiswami nen inkawmna hlawk tak an neih thu sawiin, “India-Bangladesh inkungkaihna chungchang zau takin kan sawi a, Tripura-in ram pahnihte inkungkaihna a tihngheh lehzual theih dan tura tha thawh ve theih dan turte pawh kan sawi,” a ti.
Doraiswami pawhin Twitter-ah, “Chief Minister Manik Saha nen hlawk takin kan inkawm a, a kaihhruaina azarah India-Bangladesh inkungkaih nana palai hna chu phur takin kan thawk ang,” a ti.
Tripura Governor Bais nena an inkawm chungchangah pawh ram palai chuan, “Governor-in thu min rawn pawh tha taka dawnsawn a ni a. Tripura tana hlawk tur ngaihtuah chungin Bangladesh nena inngeihna tura thawh zel a ni ang,” a ti bawk.
Doraiswami hi 1992 batch Indian Foreign Service niin Dhaka hi vawiin hian a pan tawh dawn a, Indian High Commissioner to Bangladesh thar a ni ang.