Spanish racing driver Carlos Sainz Junior chuan hun rei tak a nghah tawh hnehna a chang a. Pathianni zana British Grand Prix hmuhnawm takah pakhatna a hauh a, Formula 1 a a tel hnua a vawikhatna atan dawhsan sang ber a luah.
Silverstone tlankawng a intlansiakah thil tam tak a thleng a, intlansiak ti hmuhnawmtu a nih bakah a ti ngaihnawm bawk.
Sainz hian a team Ferrari in thutlukna an siam fuh tawk loh chu a chhawr a, a teammate Charles Leclerc-a’n hnehna chang thei a nihlaiin a chak zawkah a tang.
British driver Lewis Hamilton chuan an ram mipui hmaah fakawm taka intlansiak tlan tluanin pathumna a hauh a. Chak thei dinhmunah ding hman mahse intlansiak tawp lama tlan tha tak Red Bull car khalhtu Sergio Perez a dang zo loa, Mexican driver in pahnihna a hauh.
Hetihlai hian world champion ni lai Max Vestappen chu hnehna chang thei tura bul a tan hnuah a vanduai a, tlankawng a car them a chil chuan a car chhuat a tichhia a, hei vang hian tlan chak zui thei lovin pasarihna a hauh a. Point 34 in world championship-ah erawh hma a la hruai chhunzawm a. An elpui Leclerc-a’n point 43 in a pha lo mek.Sainz-a hun a thleng ta
World rally championship a vawi hnih champion tawh, WRC legend Carlos Sainz-a fapa kum 27 mi hi Formula 1-ah season 8 a hmanna a ni a. Pathianni zan hi F1 intlansiak a tlan vawi 150-na chiah a ni.
Sainz hian F1-ah Toro Rosso, tuna AlphaTauri ni ta ah bul a tan a, team hlun pahnih Renault leh McLaren tan pawh a intlansiak tawh a, kum 2021 atangin Ferrari car a khalh.
Season tin driver tha pawl ni thin mahsela dawhsan chung ber a la luah ngai lova, tun kartawpah che tha in a vawikhatna atan qualifying-ah tlan tha berin pole position a chang. A chak zui avangin F1 chanchin a vawikhatna atana chak tura nghak rei ber pahnihna a ni.
A chakna turin a tan vanneihna a inherchhuah rualin midang vanduai a tel a. Bul an tanin a tlan chhuak tha tawk lova, Max Verstappen-a’n pahnihna atangin a pel nghal.
Nimahsela kawi khatna thlen hma in chetsualna lian tak a awm a. George Russell-a Mercedes chuan Alfa Romeo khalhtu Zhou Guanyu na takin a hnung atangin a su a, Chinese driver hi a car nen an vir thui hle.
Car insu buai avangin intlansiak titawp lailawk nghalin bul an tan that leh a ngai a. Sector khat an tlan tlin hman loh avangin bul tan dan ngaiin an tlan chhuak tha leh. An tlan that lehin Sainz a chesual tawh lova, Verstappen a dang nghal.
Red Bull car khalhtu Dutch driver hi tun kartawpah a tlanchak fal thei hle a, practice session leh qualifying-ah a fal thin a, a vanduai vang chauhin pole position a chang lo. Hetiang a nih avangin lap 12-naah Sainz a pel a. Mahse lap hnih a liam leh tihin a car ah harsatna a awm a, Ferrrari driver pahnihin an pel.
Sainz-a teammate Leclerc chu tlan tan lamin Perez nen an intai avangin a car hma a chhia a, mahse buai phah lovin Sainz aiin a tlanchak thei zawk thin.
Mahse lap 37-naah Esteban Ocon-a car a chiang lova, a tlan chhunzawm theih loh avangin lakchhuah a ngai a, safety car an tir lut.
Hei hian Ferrari falna a nawtreh a, Sainz leh Lewis Hamilton ten remchang la in car ke thar, a nem ber an hmang a, hmahruaitu Leclerc erawh Ferrari in an ko lut ve lova, hard tyre hlui tawh an hman tlang tir.
A tawp inumah Leclerc-a’n a dinhmun a ven zawh loh phah a. Sainz-a’n a pelh hnuah hma a hruai fal a, a tawpah intlansiak tan tira a car hma thlak a ngaih avanga a hnung bera tla thla hman Perez bakah Hamilton leh Leclerc te dawhsan inchuh inum a hmuhnawm.Mercs tan kawl a eng
Tun season-ah car an siam fuh loh world champion nilai Mercedes in an tuar a, beisei ang result an nei thei lo. An car su nasa thin lutuk avangin an tlan chak thei lo thin.
Nimahsela Silverstone hi an thatna tura rin a ni a, a chhan chu tlankawng a mam tha mai a ni lova, bike intlansiakna sang MotoGP tlan nan pawh hman a nih avangin a sir daidanna pawng thin chu a mam.
Hei hi vawi sarih champion tawh Lewis Hamilton chuan a chhawr hle a, Red Bull leh Ferrari car te nen an tlanchak zawng inthlau thin chu a awm lo.
Tun thla a intlansiak hmabak pathum neihna turte Red Bull Ring, Circuit Paul Ricard leh Hungaroring te pawh mam tha tak vek an nih avangin Mercedes tan point hmuh tam theihna hun a inhawng dawn niin a lang.Eng nge an sawi?
Sainz chuan a chak hnuah, “Ka chak hmasak ber a ni a, sawi ngaihna pawh ka hre lo, he ni hi ka hre reng tawh ang. Lewis khan min um kha a tum hle tih ka hria a, a tir lamah ka car ke ka thlak hma in tlan chak ka harsat hle. Safety car kha ka tana huntha hawngtu a ni.” a ti.
Hamilton chuan, “Ferrari pahnih umpha turin ka theihtawp tak tak ka chhuah. Carlos ka lawmpui hle. A tawpah chuan han um viau thei mah ila ka hma amite ho kei aiin an tlanchak zawk a, a ngilah kan la pha lo deuh thin.” tiin a intlansiak a thlirlet ve bawk.