Canada-a tun hnaia khaw lum uchuak tak a awm hnua British Columbia-a ram kang avangin mihring inthiar chhuah mek a, sipaite pawh inthiar chhuahnaa puih ngaia che tura inralrintir an ni.
Emergency services chuan hmun 170 vela kangmei chhuak chu thelh tumin an bei mek tih an sawi a, tam tak chu tek tlain a tihkan niin an sawi.
Khawthlang lam ram zau tak chu tun hnaia khaw lum uchuak tak avangin a ro hle.
Ram kang avanga mi pahnih an thih tawhna, Lytton khua chu ram kang hian a tichhe tawh.
Lytton-ah hian Canada-a an khaw lum ber ni a thleng a, Thawhlehni kal ta khan 49.6°C lai a ni.
Defence Minister Harjit Sajjan chuan mipuite puih an ngaih huna pui turin sipai 350 leh thlawhna an inrintir tih thuthar lakhawmtute hnenah a sawi.
A hmain Prime Minister Justin Trudeau chuan a minister-te bakah a tuartu province leh ram leilung fate hruaitute nen inrawnin thil thleng an sawiho bawk.
“Pui turin kan awm reng dawn,” a ti.
British Columbia-ah chuan Vancouver hmarchhak lam km 350 vela hla, Kamloops khawpui hmar lam hmun eng emaw zata chengte chu inthiar chhuak tura hriattir an ni tawh a, an bul lawkah ram nasa takin a kang mek.
“Zirtawpni khan tek vawi 12,000 dawn a tla a ni,” tiin British Columbia Wildfire Service-a director Cliff Chapman chuan a sawi.
“Tek eng emaw zat hi Kamloops-a mihring chenna bulah pawh a tla nasa hle,” tiin broadcaster CBC hnenah a sawi.
Inrinni khan British Columbia Coroners Service chuan Lytton-ah hian mi pahnih an thi tih an puang a, Nilaini zan atanga an khaw bula ram kang avangin a cheng mi 250 vel an tlanchhia tih an sawi bawk.
Lytton Mayor Jan Polderman chuan, “Minute 15 awrh leh chhungin khaw pum chu meiin a khat vek,” a ti.
British Columbia Chief Coroner Lisa Lapointe chuan tun hnaia mi eng emaw zatin an thih phah khaw lum lutuk chu ram kan chhan bulah a puh a. Khaw lum avang mi 719 zet an thi a, tum danga thi zat thin aiin a let thum velin a tam.