Denmark khawpui, Copenhagen-a shopping centre-a silai hmet puaka mi pathum thihna thlentu nia puh, tlangval kum 22 mi chu judge hnenah hruai a ni.
Pathiannia beihna thlengah hian Danish mi pahnih, kum 17 mi ve ve leh Russian kum 47 mi an thi a ni.
A titu nia rinhlelh hi rilru lama buaina nei niin firfiak chetna lam chu a ni lo tih police chuan an sawi a. Thawhtanni khan court-ah hruai a ni.
Rifle leh chem nen a thawk chhuak a, a silai chu tum bik pawh nei lovin a hmet puak a, ‘mipa hmeichhia a thlir lo, a remchang chang a ni mai’ tiin a kah dan an sawi.
Thawhtannia thuthar lakhawmtute a kawmnaah police chief Soeren Thomassen chuan amah hi Danish leilung fa niin amahin a che a, puitu a nei lo niin a sawi.
Police hian Pathianni atang khan mipa valai tak pakhat, ralthuam nena inthuam video thehdarh pawh an chhui mek bawk.
Silai hmeh puahna thlengah hian na deuh hleka hliam mi pali an awm bawk.
Danish mi pahnih, hmeichhia kum 40 mi leh kum 19 mi bakah Swedish mipa kum 50 mi leh hmeichhia kum 16 an ni.
An zinga pakhat chu a dinhmun a tha lo hle tih hliam tuarte enkawlna hmun pakhata chief physician chuan a sawi a, a dinhmun kimchang erawh a sawi lo.
A vaiin mi 30-in hliam an tuar niin police chuan a sawi.
Inkahna hi Field-a shopping mall-ah, an ram sanaa Pathianni tlai dar 5:35 (India-a zan dar 9:05)-a thleng niin police chuan an sawi.
Chhawng eng emaw zata sang shopping centre hi Denmark-ah pawh a lian ber pawl niin a bul lawkah secondary school a awm a, zirlai tam tak, thalaiin an awmchilh.
Inkahna thlen laia shopping centre-a awmte chuan inthiarna, dawr leh kudamah an biruk thu an sawi.
Isabelle chuan Danish chanchinbu hnenah, “Silai ri kan hre thut a, vawi 10 vel a ni. Nasa taka tlanin inthiarnaah ka lut a, chep takah mi 11 vel kan tawm a. Kan nghak a, kan thlabarin a rapthlak hle,” tiin a sawi.
Police chuan silai hmet puaktu nia an puh hi silai a hmeh puah atanga minute 113 hnuah mall bulah hian an man a ni.