Mizoram social defence & rehabilitation board (MSD &RB) Social Welfare & Tribal Affairs department leh SCERT tangkawpin tun thla ni 6 thleng awh tur -Training of master trainers for drug prevention in schools- an buatsaih chu nimin khan Social Welfare department Secretary Arun Mishra chuan a hawng.
Master trainer training-a tel tur hian Mizorama district hrang hrang atangin DIET lecturer te thlan niin, damdawi hmansual chungchangah zirtirna pek an ni dawn a. International expert on drugs Debashis Mukherjee chuan MSD&RB, Social Welfare & tribal affairs department-in an buatsaih ‘Drug module’ hmangin zirtirna a pe ang.
Sorkar thuchhuahin a tarlan danin, Drug module hi naupang kum mila siam niin, Primary School, Middle School, High & Higher Secondary School-ah te hman theih tura buatsaih a ni a. Master trainer ten an awmna district chhungah Drug module hmang hian zirtirtute training an pe chhawng leh anga, zirtirtu ten naupang te hnenah naupang kum milin drugs chungchangah zirtirna an pe ve leh dawn bawk.
MSD&RB, Social Welfare & Tribal Affairs department hmalaknaa kum 18 hnuailam te zirchhiannaa a lan danin, kum 5 liamta ai khan naupang ruihhlo ti an tam a, an ruihhlo tih tan kum pawh a naupan telh telh avangin naupangte zingah zirtirna nasa taka kalpui a tul hle niin sorkar thuchhuah chuan a tarlang bawk a ni.