Ruihhlo do kawngah thanharh kan va ngai em
Ruihhloin nasa takin kan ram min run mek a, khawchhak atanga heroin leh a kaihhnawih man a tam hle, man hman loh engemawzah a awm bawk. Heti tak maia ruihhlo a hluar lehzual ta mai hi enchian a, a tirem leh do tura mitinin ke kan penchhuah a hun tawh tak zet.
Mizorama heroin an man tam ber hi Myanmar atanga tawlh a ni a, demand a san em avanga tawlh luh a tam phah nia ngaihdan awm erawh ruihhlo do kawnga hmalatu langsar ber, Excise & Narcotics Department hotute erawhin an pawm lo a, “Demand a san vang lam niin a lang lo a, a hralhna tur hriat sa loa rawn risk thlakpui hi kan man tam,” an ti.
Kan hriat angin kan thenawm Myanmar ramin tualchhung buaina nasa tak an tawk a, raltlan tam tak an awm phah, mi fel tak tak karah hian remchang lo zawng phet an awm tih kan hriatreng a tul a, heng mite dapchhuah leh man kawngah hian hmalatute pawhin tha thlah lovin thawk zel se a duhawm hle.
Tun hnaiah police leh excise-ten heroin an man hnem a, January atanga May, thla nga chhungin kg 19.814 an man tawh. Department pahnihte hian tangkawpin ruihhlo an man tihna a ni lo a, a hran ve vea an man belhkhawm a ni.
Heti tak maia kan ram min run nasatu ruihhlo tih rem kawngah hian kan thanharh a, kan inven mai bakah hmalak nasat kan va ngai em. Sorkar pawh hian mutmawh hnarmawhah nei zui ngei teh se.