Aizawl: Hyderabad-a ni hnih awh BJP National Meeting neihah BJP Mizoram State President Vanlalhmuaka chu telin, Mizorama PM Scheme hrang hrang state sorkarin a kalpui dan bakah MADC inthlan neih dante a sawi.
Vanlalhmuaka hian Mizoram state sorkarin PM Scheme hrang hrangte chu party hamthatna atana an hman thin thu leh a nih tur anga kalpui a nih loh dante a sawi a. Mizoram chhunga Ministry of Road Transport hnuaia NHIDCL hnathawh dan te, railway hnathawh dan leh PMGSY kalpui dan te pawh a sawi.
Hei bakah BJP Mizoram state president hian MADC inthlan neih zawh takah MNF leh Congress an thawh dun dan leh MNF leh Congress ten BJP an beihrawn dan te, a hnua sorkarna an siam dan te a sawi a. Party mala hnehna chang tam ber a nih thu leh kum 2023 MLA-ah chuan Mizoramah BJP sorkartir ngei tura hmalak a nih tur thu a sawi bawk.