Italian Alps hmar lama vur tui avanga vur tawlh thut vangin mi paruk an thi.
Emergency thuneitute chuan mi pakuain hliam an tawrh thu leh an zinga pahnih chu an nat hle thu an sawi.
Chhanchhuah hna thawktute chuan helicopter leh drone hmangin zankhuain chin hriat lohva mi 19 la awmte zawn hna an thawk bawk.
Video-a a lan dan chuan vur tlang hlawm lian ta chu helai vela tlang sang ber, Marmolada-ah nasa takin a tawlh a ni.
Emergency services thupuangtu, Michela Canova “Vur leh lung tawlh thut hian a hnuaia kawng, mi tam tak awmna chu hnawlin thenkhat chu a hnawl bo a ni,” a ti a. “Tlanga lawn zat chiah hi hriat mai theih pawh a la ni lo,” a ti bawk.
Kea ram kalte pawhin hliam tuarin pakhat phei chu a na hle a, tam tak chu a bulhnai damdawi inah lak an nih thu an sawi.
Helaia vur khawn awm, serac an tih mai hi engvanga tawlh ta mai nge a nih hriat a ni chiah lo.
Rescue service thupuangtu, Walter Milan erawh chuan tun hnaiah helai vel hi a lum hle a, vur a tui ta a nih theih thu sorkar TV hnenah a sawi.
“A lum dan hi a pangngai a ni lo,” a ti a, tun hnaiah helai vela ni ngai lo, 10°C lai a nih fo thu a sawi.
“A lum em em a, a nih dan pangngai ang a ni lo,” a ti.
Italian tlanglawn mi, Reinhold Messner pawhin La Repubblica chanchinbu hnenah khawvel pum lum zel avangin vur khawn hi kum eng emaw zat kal ta atang khan a tawlh hret hret niin a sawi ve bawk.
“Vur tan awm reng ngaihna a awm lo,” a ti a. Vur khawn a tawlh leh chim chhan hi ‘lei hipna vang’ ni lovin ‘khawvel lum zel vang niin vur khawnte chu a tui zel’ niin a sawi.