Manchester City chuan Pound maktaduai 45 in Leeds United midfielder Kalvin Phillips chu an lalut.
Kum 26 mi England international hian Premier League champion hnenah hian kum ruk contract a ziak a. Tun nipui a Pep Guardiola pawlten player an lakluh parukna niin Erling Haaland leh Stefan Ortega te hnung a zui.
“Manchester City ka zawm thei hi ka hlim a, he ramah hian team tha ber an nihna kuminah pawh an lantir leh tawh.”
“Squad tha tak an nei a, khawvela manager tha ber tia sawi ngam Pep Guardiola an nei. Pep hnuaia ka inkhel a, ka inzir tur hi ka tan chuan thil phurawm tawh tak a ni a. Coaching staff te nen kan thawkho tur leh squad tha taka ka tel ve tur hi ka tan chuan thil tha tak a ni.” tiin Phillips chuan a sawi.
Leeds United chherchhuah Phillips hian Elland Road-ah season 8 a hman chhungin vawi 235 a inkhel hman a. An hnenah kum hnih contract la nei mahse Leeds in sum tam taka dawrna an hnar lova, amah pawhin chhuah a duh.
Kum 2020 September khan England tan khel tanin Euro 2020-ah midfielder pawimawh a ni a, England Player of the Year 2020-21 ah an thlang.
Leeds United in Championship atanga Premier League an kaisanna kawnga mi pawimawh a ni a. Season liamta khan hliamin a tihbuai avangin vawi 20 chiah league-ah erawh a inkhel thei.
City's director of football Txiki Begiristain chuan, “Thluak hmang thiam tak, ball pass thiam leh tha za tak a ni a, chak duh mi a nih avangin kan squad a tihchak belh ngei ang.” a ti ve bawk.