Kar kal ta lama India hmarchhak, Manipur-a lei nasa taka minah mi 20 chin hriat lohvin an la awm a, thi pawh mi 40 chuang an ni tawh.
Chhanchhuah hna thawktute chuan chin hriat lohte hi an zawn chhunzawm zel a, mi 42 thi an awm tawh a. Nilainia lei min hian a bul lawka relkawng siam lai hmun a chhilh a ni.
Thi tam ber hi he hmuna hnathawka awm leh anmahni vengtu, Indian Army hnuaia mahni inpea thawkte an ni.
Thuneitute chuan ruah nasa taka sur chhunzawm leh lei la che chhunzawm zel chan chhanchhuah hna thawh a tisawt lo hle tih an sawi.
India-a fur ruahtui tla mek chuan hmarchhaka state eng emaw zatah tui a tilian nasa hle a; a bikin Assam, Manipur, Meghalaya leh Tripura ten an tuar na zual.
Assam-ah phei chuan an tuar na zual a, mi 150 chuang tui lian leh lei min avangin an thi a, mi maktaduai chuangin an in chhuahsanin hmun him an pan bawk.
Kar hmasaa lei min hi Manipur-a Noney district-ah niin rei tak ruah a sur hnua thleng niin sorkar thuneitu pakhat chuan news agency ANI hnenah a sawi.
Nung damin mi 18 chu lak chhuah an ni a; mahse, a hmuna thuneitu awmte chuan tuna dama an lak chhuah tawhte bak hi nung dama mi hmuh tur an awm a beiseiawm tawh loh thu an sawi.
Lei min hian hnawl leh hnawk a hnutchhiat tam bakah a lei a hnawng lutuk a, khawl lian nena chhanchhuah hna thawh a harsat phah niin an sawi bawk.
Chhanchhuah hna thawktute hian radar technology an tih hmangin lei leh thil dangin a chhilhte hi an zawng a ni.
Lei a minna hi Jiribam district leh Manipur khawpui, Imphal inkalpawhna tur relkawng siamna lai hmun a ni.
A min lai hian Indian Army hnuaia mahni inpea thawk, volunteer reserve force an tih, 107 Territorial Army company chuan a hmun leh thawktute hi an veng a ni.
Ruang 42 hmuh tawh zinga 27 chu sipai an ni a, mi 15 chu hnathawk, railway hnuaia thawk leh a bul hnai khuaa mite niin The Quint chanchinbu chuan a tar lang.
Tual chhung mite chuan a bula labourer camp-ah state dang atanga thawk eng emaw zat, an hming pawh an hriat loh leh tute nge an nih hriatna tura lehkha pawh nei chuang lo an awm teuh niin an sawi.
Manipur Chief Minister N Biren Singh chuan an thil thleng chu ‘an state chanchina thil vanduaithlak ber’ tiin a sawi a. A hmun hi vawi hnih a tlawh tawh bawk.