Aizawl : Chin Baptist Church (CBC) USA inkhawmpui lian, “The 7th Trennial Conference” ni 30th June atanga ni 3rd July, 2022 chhung khan neih a ni a. He Inkhawmpui lian hi Dallas, Taxas USA-ah neih niin, MZP President Lalnunmawia Pautu chuan thusawina hun a nei.
MZP President chuan MZP leh Chin Baptist Church (CBC) USA, Women Department-te tangkawpin raltlan an tanpui dan sawichhuakin, thawhhona tha tak an neih avangin lâwmthu a sawi. "Tunah hian Zofate chenna Chin Hills a buai mek a, theihtawp in pasalthate'n ram tan ke an pen a. In ram/kan ram buai mek hi theihtawp a kan tanpui an ngai a ni. Ram ropui ber USA-ah cheng mah ula, kan ram a dam loh chuan in tuar tho ang. Tun hun atan hian a ni lawm ni, ram ropui ber USA-ah hausa leh nuamsa taka in awm" tiin inkhawmpui palaite a fuih.
Pu Mawitea chuan, "Pathian min pek kan ram Chin Hills tan a taka in lo pen chhuak theilo a nih pawhin, MZP chuan engtiklai pawhin kan pui thei reng che u a. Zofate hi thisena unau chhinlung chhuak kan ni a, intihrang thei kan awm lo. Kan inpumkhat sauh sauh loh chuan ding chhuak tur kan awm lo ang. Heng harsatna leh buaina te hian min ti pumkhat rawhse" a ti bawk.
Chin Baptist Church (CBC) USA chuan, Myanmar buaina avanga harsatna tawkte tanpui nan, a tul anga hman turin MZP kutah US Dollar $ 1,000/- an lo hlan bawk.