- Ruata
A hma atanga kan lo tarlan thin tawh midsize SUV huanga Hyundai Creta leh Kia Seltos tih ho el tur chu Toyota Kirloskar Motor chuan Urban Cruiser Hyryder tih hming puin an phochhuak ta a. Online leh dealership-ah te Rs 25,000 chawiin a book theih nghal a ni.
Lei theih tura tlangzarh fel hun erawh August emaw September thla emawah a ni dawn a, tarlan tawh angin he SUV thar hi midsize SUV huanga mi a ni a. Mid-size SUV huanga lirthei hrang hrang Hyundai Creta, Kia Seltos, Skoda Kushaq leh Volkswagen Taigun te a el dawn a. Hei bakah hian Maruti Suzuki atanga lo chhuak thar tura beisei Vitara SUV chu he Toyota SUV thar pawh hian a el dawn a ni.
An inel dawn kan tih rual hian Urban Cruiser Hyryder chhuak thar hi Maruti Suzuki Vitara lo chhuak tur nen hian a platfrom, design, ken tel hrang hrang leh a khawlah te a inang deuh vek dawn a. Heng lirthei pahnihte hi Toyota leh Maruti Suzuki thawhdunnaa duan an ni a, heng company hian lirthei dang pawh an lo tichhuak dun tawh a, Maruti Suzuki Brezza leh Toyota Urban Cruiser te a inang chiah tawh a, Baleno leh Glanza pawh a inang chiah, rebadge model-in a chhuak tho tawh a ni.
A hmalamah hian full LED headlamp leh crystal acrylic grille, piano black finish awm tel kan hmu a. A kilah chrome separator an rawn vuah thla bawk a ni. LED DRL thuah hnihte hi a grille black finish-ah kan hmu bawk a, a hmalamah hian a air dam chu a LED headlamp hian a hual a ni. Hei bakah hian ‘Hybrid’ badge kan hmu bawk a, hei hi a khawl bawr kan tarlan hunah kan la bel chiang dawn a ni.
A chhunglamah chuan a dashboard hi Maruti Baleno leh Brezza thar te nen inanna a nei a tih theih a. A chhung bawrah hian soft-touch leather finish mawi tak, chrome nena chei tel kan hmu a . 9-inch touchscreen infotainment system leh Maruti Suzuki Baleno-a mi ang steering wheel a nei bawk a ni.
Heng bakah hian he SUV tharah hian dual-tone seat, connected car tech, panoramic sunroof, ambient lighting, front ventilated seat, wireless charger, 360 degree camera, multi-info display – a fuel consumption data leh strong hybrid system real time status bakah thildang tarlang thei a nei dawn a. Heng bakah hian a man to hoah hian Head-Up-Display (HUD), leather seat, sunroof, cruise control, airbag paruk, ABS with EBD, hill decent control leh vehicle stability control te a nei dawn a ni.
A khawl lamah chuan Toyota Urban Cruiser Hyryder SUV hian 1.5L TNGA Atkison Cycle a nei dawn a, hei hian 92bhp and 122Nm a pechhuak thei dawn a, hei bakah hian electric motor peak power 79bhp leh 141Nm torque pechhuak thei a nei dawn a. Toyota’s e-drive transmission a hmang dawn bawk a, a bybrid leh khawl pangngaiin a pekchhuah belhkhawm power pekchhuah tur zat hi 115bhp a ni dawn a ni. He SUV-ah hian 177.6V lithium-ion battery a awm dawn a, a electric khawl chauh a hman hi chuan km 25 vel a tlan thei ang.
He SUV thar hian tui a heh dawn lo khawp mai a, a fuel efficiency 24-25kmpl vel a ni dawn a, a elpui hoah chuan a tha ber a ni dawn a ni. Hei hi a hybrid system neih tel tha tak vang te pawh a ni awm e. He Toyota SUV tharah hian Neo Drive engine, Suzuki 1.5L K15C petrol khawl, mild hybrid tech leh Integrated Starter Generator (ISG) nei tel chu duhthlan turin a awm dawn bawk a.
He khawl hian 103bhp power leh 137Nm torque a pechhuak dawn a, transmission lamah 5-speed manual leh 6-speed torque converter automatic gearbox te a awm dawn bawk a ni. Toyota Hyryder hi midsize SUV huanga AWD (all-wheel-drive) system nei tel hmasa ber tur a ni a. FWD (front-wheel-drive) system chauh hmang pawh a awm.