Aizawl: Mizoram Pradesh Youth Congress Committee (MPYCC) chuan an vice president, Laltawnliana hoin nimin khan Aitlang, Sabual Zau-a ramri vengtu police duty-te hnenah tui in tur case 30, chhang ei tur leh filter an pe.
Congress Thalai Vice President Laltawnliana chuan IR duty-te hnenah Vanglaini chanchinbuin Aitlang, Sabual Zaua IR tui in tur filter dan a tihchhuah chu bawhzuiin ngaihsakna lantir an duh avanga tlawh an nih thu a hrilh.
An tan thil ropui leh tam tak thlen thei lo mah se ram tana pasaltha ram mute an hre reng tih an lantir an duh tih a sawi a. An thiltih hi sorkar sawisel emaw, tu emaw dema avanga kal an nih loh thu a sawi bawk.
IR duty-te hian Congress thalaite hnenah harsatna lian tham tun dinhmunah an neih loh thu lo hrilhin an tui in tur filter dan chu Chhattisgarh lamah pawh an lo tih thin dan a nih an sawi a. An tui filter thlalak pawh chu anmahni vawrh darh a nih loh thu leh tun dinhmunah chuan boruak a muanawm rih thu an lo sawi bawk.
MPYCC-in an tar lan danin Aitlang lamah hian camp pathum a awm a, an tlawh - Aitlang, Sabual Zau bikah hian IR hi ni 15 an in-duty chhawk thin a, ni 15 dan zelah an inthlak thin a ni.
Aitlang, Sabual Zau hi lirtheiin kal thlen theih a nih tawh rih loh avangin IR duty-te an thil pek tur hi a hmunah an pu thleng a ni.