Arunachal Pradesh-a doctor pahnih chu mipuiin an hnathawk lai an beih avangin doctor rualte chuan lungawi lohna lantir nan vawiin atang hian ni hnih chhung hna an thawk dawn lo.
Tukin zing dar 6:00 atang khan hna hi an thawk lo tan a, Zirtawpni tlai dar 6:00 thleng an thawk lo zui ang.
Hetih rual hian emergency service bik erawh a ngai anga kalpui turin an ti thung.
Lungawi lohna an lantir chhung hian COVID damlote pawh an enkawl dawn lo niin an sawi bawk.
Doctor-ten lungawi lohna an lantir chhan hi Itanagar Capital Region-a Naharlagun-a Samaritan Hormin Hospital-a doctor pahnih mipuiin kut an thlak vang a ni.
Samaritan Hormin Hospital-ah hian Covid-19 kai hmeichhe pakhat a thih hnuah doctor-te hi thawk tha lova puhin mipui hian kut an thlak ta mai nia sawi a ni.
Mipui thinrim hian damdawi in bungrua eng emaw zat an tichhe bawk.
Mipuiin kut an thlak doctor-te hi Dr Tabu Muri leh Dr Nabam Jadav an ni.
Doctor kutthlak leh damdawi in bungrua tihchhiat chungchangah hian Indian Medical Association-Arunachal Pradesh branch (IMA-AP), Arunachal Pradesh Doctors’ Association (APDA), Indian Dental Association-Arunachal Pradesh branch (IDA-AP) leh TRIHMS Faculty Association chuan pawi an tih thu leh thinrimthlak an tih thu an sawi hlawm.
“Itanagar Capital Complex-a doctor-te chu ni hnih - Zirtawpni leh Inrinni hian emergency tih loh an buaipui dawn lo,” tiin IMA-AP chuan a sawi.
Samaritan Hormin Hospital-in thuchhuah an siamah chuan damlo thi ta chhungte hian a thih dan an sawite chu an pawm lo va, “Damdawi in bungrua suasamin doctor leh thawktu dangte pawh an vaubet ta a ni,” an ti.