AMC Ward XVI bialtu Councillor R. Lalawmpuii’n “MHIP leh kohhran hmeichhiaa kan inhmanna te hian chhungkua kan enkawlna tibuai suh se” a ti.
Bethlehem Vengthlang leh College Vêng-ah te MHIP Day hmanpuiin nimin khan he thu hi bialtu Councillor R Lalawmpuii chuan a sawi a. "MHIP emaw kohhran hmeichhia emaw ang in activities tam tak kan nei a, heng te hian kan pawimawhna hmun kan fanau leh inchhung kan enkawlna hi tibuai suh se", a ti a. Sikul hmasaber chu chhûngkua a nih thu leh chuta zirtirtu hmasaber te chu nu te an nih thu a sawi.
Mizo hmeichhia te chu taima, pasal te thawhchhuah rin ringawt tum lo, mahni theihna leh phâk ang tawka hnathawh tum tlat mi an nih tawh thu sawiin, Mizo tawng upaa 'hmeichhe finin tuikhur ral a kai lo' tih pawh tunlaiah chuan a dik tawh loh thu a sawi bawk.
AMC Ward XVI bialtu Councillor R Lalawmpuii hian Bethlehem Vengthlang leh College Vêng MHIP te hnenah MHIP Day lawmpuina Rs. 5,000 ve ve a pe a ni.