Aizawl : Siaha district level committee for prevention, control and containment of African swine fever(ASF) chu Siaha Bawrhsap Lalsangliana hova thukhawmin, dist pawn lam atanga Vawk lakluh khapna thupek tun thla ni 11-a tawp tur chu puan chhunzawm ni se, an ti.
Bawrhsap hova thukhawm chuan Siaha district-ah ASF a lut palh a nih pawha AH&Vety department leh police department te bakah mipuite tanho dan tur te an sawiho a. VC tin hnenah tih tur leh tih loh tur leh AH&Vety an tanpui theih dan tur te hrilhriatna thuziak (pamphlet) siama sem an rawt.
ASF kai Vawk suat dan tur leh a phum dan tur te sawihovin, bio-security/sanitationery measures inzirtirna tam zawk neih te an rawt bakah Vawk thi/Vawk damlote chu District Vety Hospital, Siaha-ah rang taka hriattira, test tir thuai tur a nih thu an sawi.
District veterinary officer Dr.C. Khawlthangmawia'n a sawi danin, Nikum April ni 15 khan Siaha district-ah ASF a lut tih finfiah a ni a, nikum vek December-ah a kiansan leh nia hriat a ni. Nikumah April - December thlengin Siaha dist-ah ASF kai Vawk 274 an thi a, hri avanga suat 146 an awm bawk.