Pop icon Rihanna (34) chu US-a chhungte hausakna zar zo lova mahnia dingchhuak hmeichhe billionaire naupang berah puan niin, a hausakna hi US$Billion 1.4 a tling. Kylie Jenner a phet thla chiang hle.
Forbes-in a tihchhuah thar ber, ‘Richest Self-Made Women 2022’ ah hian 2019 kuma he nihna chelhtu hi Kylie Jenner niin, tuna a hlutna hi $Maktaduai 600 vel nia hriat a ni.
Rihanna hian sumdawnna leh sum siamna peng pawimawh, lian leh langsar tak tak a nei nual a; Fenty Beauty, Fenty Skin, leh Savage X Fenty lingerie line atangte’n sum a la lut hnem hle.
Forbes tarlan zel danin, a pianna ram Barbados chhulchhuak zinga billionaire hmasa ber a ni bawk a. Kum 40 hnuai lam hmeichhe zinga US hmeichhe billionaire lang thei awmchhun a ni nghe nghe.
Tunah hian a pasal ASAP Rocky nen fatir an nei hnai tawh a, music thar te tihchhuah a tum bawk nen, hmabak duhawm tak a nei mek.
“Tunhma lama ka lo ngaihtuah dan ang lo takin ka hmachhawp lo awm turah hian ngaihtuahna thar ka seng dawn a, ka inhmehin, tihfuh ngei pawh ka inbeisei. Pressure tam tak pawh tunah chuan a tla duak tawh turah ka ngai,” tiin Rihanna hian a sawi.
Forbes chuan kum 24 mi Kylie Jenner hi America rama mahni ke-a ding hmeichhe hausa zinga naupang berah a la chhal reng a. Popstar Taylor Swift ($Maktaduai 570), Bumble hmuchhuaktu Whitney Wolfe Herd ($Maktaduai 740) te pawh an lang. 2022 list-ah hian kum 5 zawnin hmun a chang ta bawk.