Ram ngawa khaw pahnih, Laika leh Dodhia-a cheng chhungkaw 1,480-ten awm hmun tha an neih theih nana nawrna kalpui mektu zinga mi, nu nau pai lai chu vawiin khan Assam Medical College Hospital (AMCH)-ah a thi.
Hmeichhia hi kum 24 mi, Kusmita Morang a ni.
Kusmita hi Assam-a Tinsukia-a deputy commissioner pisa bula nawrna kalpui mekna hmun atangin ni thum liam ta khan a dinhmun a that loh avangin AMCH panpui a ni a. Dodhia Kuligaon khuaa mi a ni.
Ram ngawa chengte hian district thuneitute an nawr nat zawk theih nan Lezaihola Borguri-ah relief camp siamin an awm khawm.
An zinga pakhat, Radhika Chungrang chuan, “Kusmita hi ni eng emaw zat kal ta atang khan camp-ah hian a awm ve a. Nau a pai a, a dinhmun a hniam zel avangin Tinsukia civil hospital-ah kalpui niin Dibrugarh-a AMCH-ah an lo thawn a. A hnar atangin thi a chhuak nasa hle,” a ti.
Chungrang-i chuan, “Kan thil phut a hlawhtlin hma chu kan kal zel dawn a. Sorkarin January 31 hmaa kan awmna tur a tifel lo a nih chuan assembly inthlan lo awm tur chu kan boycott ang,” a ti.
A hmain an zinga hmeichhe pakhat kum 55 mi, Reboti Pao chu ina a haw hnu lawkah a thi tawh bawk.
Khaw pahnihte hi Dibru-Saikhowa National Park chhunga awm niin kum 1950-a lirnghing rapthlak tak avanga chenna in chân, hetianga awm khawm ta hi an ni.
Danah national park chhunga khaw awm leh khawsak phal a ni lo va, sorkarah an awmna tur siamsak turin an nawr mek a ni.