Hachhek Constituency Development Committee (HCDC)-in Mizoram sorkar chu dan lova sumdawnna kalpuitute thurualpuia an ngaih thu an sawi.
HCDC chuan HBKCP-in kumin June 6-a Chief Minister Zoramthanga hnenah dan lova foreign kuhva Mizorama lut thin titawp tur leh kuhva hmanga dan lova sumdawngte June thla chhung ngeia man chhuaka an phu tawk hremna pe tura an ngennain tun thlengin awmzia a la nei lo tih sawiin, hriatthiam har an tih thu an sawi.
“Kan sorkar hian dan lova sumdawnna kalpuitute a thurualpui lo a nih chuan dan lova kuhvaa sumdawngte leh an thurualpuite zawng zawng a rang thei ang bera man chhuaka an phu tawk hremna pe ngei turin kan ngen a ni,” an ti.
HBKCP-ten chief minister an ngenna chungchanga sorkar hmalakna an ngaihchan reng laiin, June 28, 2022-ah Hachhek bial chhungah ngei foreign kuhva bag 285 man a ni tih thu leh tun thla ni 7-ah bag 300 man a ni leh thu HCDC chuan an sawi a. “Kan bial chhung hi dan lova kuhva tawlhna kawnga hman kan phal lo tih min hriatsak turin sorkar kan ngen a ni,” an ti bawk.
HCDC chuan dan lova kuhva tawlh chungchanga HBKCP leh Hachhek all NGO-te hmalakna an thlawp tlat thu sawiin, a tulna apiangah theihtawp an chhuahpui zel tur thu an sawi bawk a ni.