Kum 2020-a khawvel puma mihangte chanvo hmuhsitna thleng thin dodalna nasa tak chhuah phahna, Minneapolis police officer hlui, Derek Chauvin chu George Floyd-a dikna chanvo a palzutsak avangin kum 20 chuang tang tura hrem a ni.
Kum 46 mi, Chauvin-a hi December thla khan a hranin mi dikna chanvo a palzutsak avangin thiam loh chantir a lo ni tawh bawk.
A hmain a duty laia kum 46 mi, mihang Floyd-a a that avangin kum 22 tang tura hrem a lo ni tawh bawk.
Hremna pahnih hi a ruala kal tur niin Chauvin-a hi sorkar laipui tan inah sawn a ni ang.
Ningania a hremna puan a nih hma khan Floyd-a unaupa, Philonese chuan judge hnenah kum 25 tan tir turin a ngen.
Mingo, Chauvin-a hi Minnesota-a Floyd-a nghawnga minute kua aia tam mah a thingthita hnua a thih avangin tualthat leh mi sawisaa puh vanga thiam loh chantir a ni.
A che lai hi a bul lawka awm pakhatin a phone camera-in a lo la a, khawvel pumah he thil hi darhin police-in chi inthliarna rawngkaia an chetna demna a nasat phah hle.
May, 2020-a Floyd-a chunga a tihnaah hian Chauvin-a hi phuar (handcuff) chunga a nghawnga a thingthit te, a hnua damdawi thiamten an ennaa a thingthit vanga a nunna pawh lak ni ta tih an hmuh avanga thiam loh chantir a ni.
Chauvin-a hian kum 2017 khan mipa naupang kum 14 mi dikna chanvo a lo palzutsak tawh tih hriat a ni bawk a, hei pawh hi court-ah hian pho chhuah a ni.
Heta a lan dan chuan Chauvin-a hi a hrawkah a rek a, flashlight-in a lu-ah a chhu a, a nghawngah leh a hnungah a thingthit a. Hetih lai hian naupang hian a nu a au lawm lawm nia sawi a ni a, Floyd-a ang bawkin naupang hi mihang a ni.
Prosecutor-te chuan tihdarh loh bodycam footage-ah Chauvin-a hian naupang hi minute 17 lai a thingthit niin an sawi.