Japan prime minister hlui, Shinzo Abe chu inthlan atana campaign-a thu a sawinaah kah niin a hnu lawkah damdawi inah a thi.
Abe-a hi Nara khawpui kawtthlera Zirtawpni chawhma lama thu a sawi chu vawi hnih kah a ni.
A hmuna venhim hna thawktute chuan a kaptu nia rin ber, mipa kum 41 mi chu beiin an man nghal a, police-in an kawl mek.
An mi man hi Tetsuya Yamagami-a a ni a, tualchher silaiin Abe-a hi ‘a pawl pakhat a huat hle avangin’ a kap niin police chuan an sawi.
Thuthar lakhawmtuten an kawmnaah police officer-a chuan a chenna an dapnaah Abe-a a kahnaa a hman ang chi tualchher silai eng emaw zat an hmu tih an sawi.
Puak theite pawh hmuh a ni a, police chuan a bul hnaia chengte chu insaseng rih turin an ti.
Silai hmet puaktu nia an puh hian Abe-a pawh inhnamhnawiha hriat pawl pakhat chu a haw hle tih a sawi niin police chuan an sawi a, engvangin nge he pawla tel ve dangte beih lova prime minister hlui kher a beih chhan an chhui zui mek.
Japanese chanchinbumi thenkhatten Abe-a chu a tum bik reng em ni tih an zawh chuan police hian Yamagami-a hian prime minister hlui ngei hi a tum tih a insawi niin an sawi.
Prime Minister Fumio Kishida chuan he thil thleng hi a dem tak zet tih a sawi a, “A nunrawn thlak a, a huatthlala a, palzam mai mai chi a ni lo,” a ti.
Kishida chuan, “He beihna rawng tak hi kan ram mipui rorelna lungphum, inthlan neih laia thleng a ni a, ngaihdam theih a ni lo,” tiin Abe-a a thi tih puan hma lawk hian a sawi.
Abe-a hi silaimu pahnihin a nghawnga kah a ni a, a lung pawh a khawih chhia niin doctor-te chuan an sawi.
Kah a nih hnuah pawh nikhua a hria a, a biak theih a; mahse, kum 67 mi hi a hniam zui ta telh tel a ni.
Doctor-te chuan damdawi in thlenpui a nih meuh chuan prime minister hi a taksa peng pawimawhten hna an thawk meuh tawh lo tih an sawi a, thisen pawh eng emaw zat an pe hman a ni tih an sawi.
Abe-a hi Japan-a prime minister ni rei ber niin kum 2006 khan kum khat lek a ni a, kum 2012 leh 2020 inkar zawng ni lehin a hrisel loh vangin a chawlhsan a ni.