Mother Teresa-i’n a din pawla rawngbawltu, nun-te chu Nicaragua ram atangin chhuahtir an ni a, an pawl hi dan angin an nihna hlihsak an nih hnuah chhuahtir an ni.
Police-in ramri-ah dahin an thenawm, Costa Rica-ah kein an lut a ni.
An pawl hi President Daniel Ortega-a sawisel leh ep zawnga che pawl thiah hnuhnung ber an ni.
Catholic Church chuan Nicaragua-ah hian mihring dikna chanvo nasa taka palzut a nih thu an lo sawi tawh thin.
Tual chhung chanchinbute chuan Missionaries of Charity-a thawk nun 18-te hi ramri-ah migration thuneitute leh police officer-te kaihhruaina hnuaia bus-a phurh chhuah an ni tih an tar lang.
An pawl hi June 28 khan Nicaraguan parliament chuan dan angin a thiat a, an ram rorelnaah hian President Ortega-a kaihhruai, Sandinista party chu an tam zawk.
Nun-te hi kum 1988 atang khan Nicaragua-ah hian mi retheite tan an thawk a, nursery an din a, hmeichhe humsual dai enkawlin nursing home an nei bawk.
Sorkar chuan sorkar hnuai ni lo pawlte hi an sum hmuh dan leh hman dan a fel lo nia puhin a thiat nual tawh.
Kum 2018 atanga sum hmuhna dan khauh tak an siam hmangin pawl 200 chuang zet chu tihtawp a ni tawh.
Pawl tihtawp zingah hian hriat hlawh tak, Nicaraguan Academy of Language leh naupang piangsualte zai hna thawk thinte pawh an tel.