Bollywood-a tla na tawh lo nia sawi actor Rhea Chakraborty chu Tollywood lamah kan hmu thut thei. Beisei phawt teh ang.
Bengali film producer Rana Sarkar chuan tunhnai khan film script pakhat pe in, a changtunu nih theihna remchang a kawhhmuh a, ‘tun dinhmun aia tha zawk i phu’ tiin a hrilh.
Sushant Singh Rajput, thi a hmuh anih hnu atang khan a bialnu Rhea Chakraborty hian kil hrang hrang atangin beih a tawk nghal mawlh mawlh a, Bollywood lei rem rah tum mek a nih laiin vanduaina thuah hnih a thleng chhunzawm nghal.
Rana chuan, “Rhea-i eizawnna kawng hi a tihsual awm miah si lova tihkhawh lohin a awm mek a, harsatna tam tak a hmachhawn a, Mumbai lamah hmun a chang thei lo. Bengali a nihna leh tu emaw bialnu hlui a nihna chuan a rum thaih reng mai bawk nen.. hei aia dinhmun tha a phu ngawih ngawih tih hi ka pawm dawn a ni,” a ti.
Rhea hi 2021 kuma thriller dangdai tak, ‘Chehre’ film-ah khan hmuh hnuhnung ber a ni.
India leh khawvelin hripui thawhkhatna hmachhawn a, lockdown a kalpui chhoh khan Bollywod actor Sushsant Singh Rajput chu Mumbai-a a chenna Inah inawkhluma hmuh a ni a, Indian mipui a barakhaih hle.
Hemi hnu lam kaihhnawih leh nueh neuh kal zelah Bollwood chhungkuaah thil mak pui pui a lo chhuak nghal a, inpuhtawnna leh indemna a ri nghal chuah chuah. A bialnu nia sawi Rhea Chakraborty hming a langsar lehzual a, sawisel ahlawh nasat vangin a khawvel a zim hle.
A thih cham kumkhatnaah khan thu lungkuai zet mai instagram-ah a ziak chhuak a, mahse a tlak nat dan a fuh lo. Ei lo fe fe an tam. Mi tam takin lem changah an ngai a, an deusawh nasa hle.
“Hetah hian i awm ve tawh lo nia rinna hi vawikhatte mah ka la nei ngai lo. Hun hian engkim mai a tidam thei niin sawi mah se, ka hun leh engkim i ni bawk si a ni. Tunah chuan min hualhimtu ka vantirhkoh i ni tawh a, chhawrthlapui atang khian i enhlatna hmangin min thlir reng a, min veng reng thin tih ka hria.
“Heta i awm ve lo nia hriatna a lo luh zeuh te hian tawrhna hrang hrangin ka taksapum a vet chhuak nghat thuai thin. He thu ka ziah lai pawh hian ka thinlung a kehsawm a, a na ngawih ngawih. I tel lo chuan nun hian awmzia a nei lova, vahvaihna mai a ni. Hringnun awmzia i kalpui daih si a ni. He hmunruak hi luahkhah theih a ni ngai lovang.
“I tel lovin mal takin ka awm mek. Khawngaih takin lo kirleh hram rawh aw.. Ka thiantha ber, ka hmangaih leh ka duhlai, ka ngai takzet che.”
Sushant thihna ah khan a bialnu Rhea hi kut sil thei lova puh niin, tun thleng hian fan maktaduai tam takte chu a lakah an lungawi thei lova, engtin emaw taka inhnamhnawih ngeiin an hria a ni..