AIZAWL: India ramin zalen champha vawi 75-na lawmna -Azadi Ka Amrit Mahotsav (AK- AM) kalzelah nimin khan sorkar laipuia Environment, forest & climate change ministry ruahmanna bawhzuiin Zote, Champhaia Nagar Van area-ah District Bawrhsap James Lalrinchhana hovin Thingphun Kutpui (Hariyali Mahotsav) an hmang.
Sorkar thuchhuahin a tarlan danin India rama Nagar Van 75 leh Plantation site 75 thlan chhuahahte nimin khan a rualin thingphun hnatlang hi neih a ni a, an hun hman dan te internet lamah thlir theiha pholan nghal zel a ni. Champhaah hian Tlangsam, Hmunhmeltha leh Zote rama NEC plantation site-ah te pawh thing hi phun a ni a. Theihai, Theifeimung, Lumler, Theiarlung, Ngiau, Paivun, Thingsen leh Tlaizawng, a vaiin thing tiak 1030 an phun a ni.
Champhaia thingphun kutpui hmanna hmun Nagar Van-urban forest Champhai hi khawpui ramngaw, mipuite tan boruak thianghlim pechhuaktu tur, tuihna siamtu tur, lenkhawthawnna leh thil zirna atana ramngaw humhalh a ni a. Nagar Van scheme hnuaiah khawpui ramngaw ven him nana hung, a tulna laia thing phun belh, vantlang remchang siamte a tel a. Mizoramah chuan Aizawl leh Champhaiah te khawpui ramngaw siam tura hmalakna Nagar Van project hi kalpui a ni.
Nagar Van Champhai huam chhungah hian thing thawl deuhna laiah thing chi hrang hrang- Theihai, Theifeimung, Avocado, Pear, Theifarbang, Lamkhuang, Thingthupui, Khu- angthli, Lenhmui, Tlaizawng, Chawmzil, Tei, Ngiau leh Char tiak 2000 vel phun tawh a ni a, phun mek zel a ni bawk.
Champhai Bawrhsap James Lalrinchhana chuan mihring, nungcha leh thlaite leilung luaha khawsa tlanga nungho tura duan an nih thu sawiin, khawpui hnaivaia ramngaw Nagar Van-urban forest chu khawpui mamawh boruak thianghlim siamtu leh thlifimtu pawimawh tak khawpui chuap a nih thu a sawi bawk.