Hachhek bialtu MLA Lalrindika Ralte chuan a bial chhunga sorkar check gate paltlanga kuhva tawlh ruk mi tlawmngai duty-ten an man chu sorkarin dan leh thupek a kenkawh tawk loh vang niin a sawi.
Lalrindika Ralte hian thuchhuah siamin tun hnai June 28, 2022 leh July 7, 2022-a a bial chhung, Zamuang khaw daiah kuhva tawlh ruk man a nih chungchangah kuhva tawlh rukte hi sorkar hnuaia dan leh thupek kengkawhtute man ni lo a, tlawmngaia duty kuthnathawktute man a ni chu sorkarin a tih tur a tih loh vanga hetiang thleng a nih thu a sawiin, tlawmngaia duty-te hmalakna a thlawp tlat thu a sawi.
Ram dang atanga dan loa kuhva lut avanga a bial chhung mipuiten an kuhva thar chhuah hralhna kawnga harsatna an tawk thin chu pawi a tih thu sawiin, “A chhan bulpui ber chu dan loa kuhva lo lut, Mizoram chhunga awm ngei pawh man duh lo sorkar a awm vang a ni,” a ti.
Bialtu MLA Lalrindika Ralte hian dan loa ram dang atanga kuhva lo lutin a khua leh tuite tan harsatna nasa tak a siam tih hre turin Mizoram sorkar a phut tih a sawi a. A rang thei ang bera kuhva tawlhtuk titawp tur leh kuthnathawktute harsatna sukiang turin Mizoram sorkar a ngen tih a sawi bawk.