National Liberation Front of Tripura (NLFT) hel pawla tel mi 43 zet chu tun hnai thla sarih, November, 2020 leh May, 2021 chhung khan Tripura police-ten an man.
Tripura police hotu liante chuan thla sarih chhung vek hian NLFT mi leh sa 19 chu police kutah an inpe bawk tih an sawi a. Hetih chhung hian thalai 20 velin hel pawl hi an zawm thung.
NLFT hi commander inti, Dilip Debbarma chuan Tripura-ah hian tun hnaiah hian tharthawh leh tumin a bei nasa hle nia hriat a ni a. Thenawma Bangladesh ram atanga che an ni.
Thla sarih chhunga hel pawl mi 43 man zinga 11 hi January-a mante an ni a. NLFT hi kum 2019 thleng kha chuan an thawm hriat tur a awm meuh tawh lo va, kum 2020 bul lam atang khan hriat tur an awm leh tan.
Tripura police-a special branch chuan a hma atang tawhin intelligent-te atangin an nung leh tan tih an lo hre thawi tawh.
“Bul an tan leh dawn tih hriat a nih atangin district police leh Tripura State Rifles (TSR) nena tang kawmin NLFT hi chhut chimih tuma beih char char a ni,” tiin an sawi.
“Intelligent-te atanga thu kan dawn bawhzuiin beihpui an thlak thin a, kawng hrang hrangah hlawhtlinna kan chang bawk a ni,” an ti.
November, 2020 leh May, 2021 inkar hian police chuan 9 mm pistol pahnih, magazine pahnih, RDS 17 leh pawisa fai Rs nuai 15 an man tel.
Inpete kut atangin AK rifle pathum, magazine paruk, AK rifle m 159, pistol panga, pistol mu 14, extortion notice 15 leh Myanmar pawisa nuai 1.5 an man bawk.