Europe khawmualpuia khaw lum uchuak tak thleng mek chuan Portugal, France leh Spain-ah te ram nasa takin a tikang mek.
Portugal-ah hian kangthelhtu mi 3,500 chuangin hmun eng emaw zata kang an thelh mek a, hetih lai hian an ram hmun eng emaw zatah khaw lum ber tum record thar a thleng mek bawk.
Ram kang tuar na ber chu Leiria niin mi 600 vel an chenna in chhuahsan rih tura tih an ni.
Tuna thil thleng mek hian kum 2017-a an ram chanchina ram kang nasa ber, mi 100 chuang an thihna chu a hriattir thar nasa hle.
Khaw lum uchuak hi sik leh sa inthlak nasa avangin a na tawlh tawlh a, a rei tawlh tawlh a, sawi lawk pawh a harsa telh telh a. Khawvel pum hi industrial era hun lai aiin 1.1°C velin a lum tawh zawk.
Leiria-a lo neitu kum 77 mi, Adelino Rodrigues chuan ‘engkim a kang ral’ niin a sawi a. “Khawvel tawp ang mai a ni,” a ti.
Hmar lampanga Aveiro region-a ram a kanna hmunah mi pakhat ruang chhar a nih thu thuneitute chuan an sawi.
Portuguese Prime Minister António Costa chuan Ningani kha a lum ber tum a nih a rinawm thu a sawi.
France-ah chuan hmun hniha lian tak taka ram kang chu mi 1,000 chuangin a thelh hna an thawk mek.
An ram chhimthlang lama kang chuan ram hectare 4,000 dawna zau a tuam tawh.
Spain-ah chuan Nilaini khan an ram pumah inralrinna dar khawn a ni a, sorkar meteorological agency AEMET chuan region thenkhat phei chu a lum zual dawn hle tih an sawi.
Andalusian-a Almonte khuaah phei chuan Nilaini khan 45.6°C zeta lum a ni a. Hmun dang thenkhatah chuan Ningani kha a lum ber hun tur niin an sawi.
Spain-ah hian sorkar chuan January 1 leh July 3 inkarah ram hectare 70,300-a zau a kang tawh tih an sawi a, kum 10 liam ta chhunga kum khata kang zat thin chawhrual leta zau a kang tawh.
Turkey chhimthlang lama Datca peninsula-a ram kang mek avangin mi 3,000 chuang insasengtir an ni bawk.
Europe-ah hian tun kar chhung zawng khaw lum uchuak a thleng tawh a. UK-ah chuan Thawhlehni lo awm tur hi a lum ber hun tur nia sawi lawkin 36°C vel a nih an ring.