AIZAWL: Champhai district-a hman khat daih polythene/plastic (single use plastic) tihrem ka- wnga hmalak dan tur ngaihtuahin nimin khan Champhai Bawrhsap James Lalrinchhana hovin a kaihhnawih mipawimawhte an thukhawm a. Sorkar pisa, zirna in, damdawi in, clinic, sports hmunhma leh mipui punkhawmna hmunahte hman khat daih polythene/ plastic hmang lo tura ngenna siam ni se, an ti.
Dawr, bazar, catering leh hmundang danga hman khat daih polythene leh plastic hman thin chu inzirtirna leh inkawhhmuhna mumal tak siama hmang tawh lo tura inhrilh ni se, an ti a. Digital flyer siama thehdarh rawtin, department tinah Enforcement squad dina a tul anga endikna thin ni se, an ti.
Inzirtirna banner, poster leh ngenna lehkhate tihchhuah tawh thin a nih thu DUDO-in a sawi a. Mipui nawlpui, single use plastic hmang nasa dawrkai leh thil zuarte hnenah inzirtirna August thla tawp thlenga neih ni se, an ti a. September ni 1, 2022 atangin khauh taka dan kenkawha, dan bawhchhiate chungah hremna lekkawh ni se, an ti bawk.
Champhai Bawrhsap chuan hman khat daih polythene leh plastic dangte hman tihtawp tuma hmalak meknaah vawilehkhata tihhlawhtlin nghal mai a harsat pawhin a tahtawla inzirtirna leh inhrilhhriatna mumal tak nei chunga hmalak a tul thu a sawi a. "Department pahnih/khat chunga mawhphurhna kan dah chuan a hlawhtling ngai dawn lova, kan zavaiin kan tantlan a tul, a ti bawk a ni.