Ramri venghimtute duat leh duhsak zel a hun
Assam nen ramri buaina kan nei leh thin a, reh deuhin lang mah se, a tu ve ve pawh hian a rukin inepna kan la nei zel dawn niin a lang. Vawiin thlengin ramri venghim turin sipai dah an la ni a, kan hmalam hun zel hriat ni lo mah se, a khat tawkin khawii emaw laiah chuan rik deuh hat kan la nei zel dawnin a lang bawk. Chutiang hun a lo thleng a nih pawha inralrin reng erawh kan tih tur a ni.
Ramri depa awm, Serlui lamin he ramri buaina hi an tawk nasa zual a, mipui pawh englai pawhin che thei reng turin an inpeih ni pawhin a hriat. An bialtu MLA viak a tha a, tunah phei chuan Vairengte-a Aitlang hmuna sipai duty camp-ah pawh electric pawh luh a ni leh tawh tih a sawi thar leh tawh bawk. A lawmawmin, kan ramri venghima duty te hi duat leh a theih ang anga duhsak an phu reng a ni.
Hetiang hian hmun dang zelah pawh tih ni thei se, kan ramri venga duty te hi duat thar fo ila, eng mai bakah kalkawng leh ei leh in tur thleng hian duhsak nise, a theih chin chinah an mamawh ang ang hi chu nghei lova pek ni zel bawk teh se.
Ram leh hnam hmangaihna rilru hi pu thar fo ila, sorkar pawhin a sipaite fuihin, chutiang thinlung pu tur chuan hrilhin, fuih fo bawk se. Kan hma hun lokal zel turah pawh ram leh hnam chhan nan chuan engpawh tih an huam zual ngei ang.