India ramah darkar 24 liam ta chhung khan coronavirus kai mi 16,935 hmuh chhuah leh niin ni 161 zet hnuah ni khata sample endik zinga a kai hmuh zat (daily positivity rate) chuan 6% a kai leh ta bawk.
India-ah hian COVID-19 kai mi 4,37,67,534 an awm tawh a ni.
Union health ministry chhinchhiah dan chuan hri kai enkawl lai mi 1,44,264 an la awm mek a, mi 51-in thihpui lehin mi 5,25,760-in an thihpui ta bawk.
Hri kai hmuh tawh zawng zawng atanga chhutin a kai enkawl lai hi 0.33% an la ni mek a, 98.47% erawh enkawl dam an ni leh tawh.
Darkar 24 liam ta chhungin enkawl dam aia a kai hmuh thar an tam zawk avangin enkawl lai hi mi 815-in an pung leh hman a ni.
Daily positivity rate chu 6.48% niin chawlhkar khat liam ta chhunga endik zinga 4.58% chuan hri hi an kai tih hmuh a ni bawk.
Hripui a len atang khan sample vaibelchhe 86.96 chuang endik tawh niin darkar 24 liam ta chhung khan sample 2,61,470 endik a ni bawk.
Darkar 24 liam ta chhunga Covid thihpui mi 51 zingah hian hmarchhakah Assam-ah pathum, Manipur, Nagaland leh Sikkim-ah mi pakhat theuh an tel ve a ni.