Tun hnaia court-in CADC sorkar sum hman dik loh thubuaia thiam loh a chantir, Tuichawng bialtu MLA Dr BD Chakma chu Mizoram Legislative Assembly member zinga court-in a convict hmasa ber nia a hriat thu Assembly Speaker Lalrinliana Sailo chuan sawiin, convict a nih avanga MLA a nihna atanga disqualify theih a nih leh nih loh chu uluk taka zir a nih tur thu a sawi bawk.
The Zozam Times zawhna chhangin Rinliana Sailo chuan court-in eiruk thubuaia Dr BD Chakma a convict chungchang chu law minister pawh a hrilh hre nghal tih sawiin, convict a nih avanga disqualify a nih theih leh theih loh dan chu assembly secretariat-a official-te nen uluk taka an zirho tur thu sawiin, “Expert-te pawh thlirtir kan tum ang,” a ti.
MLA zingah eirukna emaw, thil dang emawah court-a inhek an awm fo thin a, thubuai nei pawh an awm nual tih speaker chuan a sawi a, chutihrual erawh chuan court-in thiam loh a chantir tak erawh chu Dr BD Chakma tih loh mi dang Mizoram MLA zingah an awm a hriat loh thu a sawi a ni.
Tar lan tawh thin angin kum 2013-14 chhoa Chakma Autonomous District Council hnuaia hmasawnna tur sum sorkar laipui atanga an hmuh Rs. 1,37,10,147 dan loa an hlawh atana an lo hman avangin khatihlaia CADC-a MDC 13-te chu special court-in thiam loh a chantir a, an zingah hian CEM hlui, tuna Tuichawng bialtu MLA Dr BD Chakma pawh a tel a ni.