MNF party chuan tun hnaiah Assam sorkarin ramri chungchanga inbiakna neih an duh thu Mizoram home minister hnenah an thlen a, rawtna rawn siam tura chhan let a ni tih leh Assam lam thu leh hla ngaihchan zui mek a nih thu an sawi.
Hemi chungchanga MNF party-in thuchhuah siama an tar lan danin July 7, 2022 khan Assam Border Minister Atul Bora chuan Mizoram Home Minister Lalchamliana biain ramri chungchangah inbiak an duh thu leh Mizoram Chief Minister Zoramthanga pawh hmaichhanah ngei ramri chungchang sawipui a duh thu a rawn hrilh tih an sawi.
Home minister hian rawtna rawn siam turin Assam minister hi a lo chhang let tih sawiin, Assam lam thu leh hla hi la ngaihchan zui mek a ni tih an tar lang.
MNF party thuchhuah chuan nimin, July 26 kha nikum lama Assam leh Mizoram ramria buaina avanga inkahna thlen champha kum khatna a ni, hemi tum hian Assam police pasarih laiin nunna an chân tih sawiin, he ni lo thleng hi ram leh hnam tana ngaihtuahna hman tharna ni leh inhlan thar nia hman an duh thu an sawi.
Mizoram ramri humhalh tur hian ramri-ah hmasawnna hna thawh a pawimawhzia hriain MNF sorkarin theihtawpin hma a la mek zel tih sawiin, Mizoram ramri hmun hrang hrangah a theih ang angin hmasawnna hna kalpui mek zel tih te, ramri chin fel hna thawk tur hian Mizoram sorkar chuan Deputy Chief Minister Tawnluia chairman-na hnuaiah Boundary Committee a din a, he committee hian thutkhawm vawi eng emaw zat nei tawhin Mizoram ramri atana BEFR 1875 ramri chu an pawm tih an tar lang bawk.