Congress party chuan finance department changtu, Chief Minister Zoramthanga a tlaran zawng hlira a chet avangin Mizoram sum leh pai dinhmunin hniam lam a pan zel niin an sawi.
Nimina an thuchhuahah Congress party hian kum 2018-a MNF a sorkar hlim khan Mizoram sorkar sum leh pai dinhmun a tha hle a, leiba a tlemin bill pek theih loh a awm lo a, hmasawnna hnathawhna tur cheng vaibelchhe tam tak Congress sorkar khan a hnutchhiah hial tih sawiin, “Hei hi Congress sorkar liam tain Finance Minister Pu Lalsawta enkawlna hnuaia ram sum leh pai dinhmun nasa taka an siam that vang a ni,” an ti.
December, 2018 atanga MNF-in thuneihna an chan atangin chief minister-in sum tamzia sawi reng chunga a duhsak zawngte vur nana mipui sum a hman hiau hiau avangin tun hnaia CSS sum pek chhuah a nih hnu atang khan eng bill mah treasury-ah pass theih a nih tawh lo a, Mizoram sum leh pai chu ICU-ah a awm phah hial laia finance minister-in siam that tuma a chetna emaw, sum leh pai dinhmun dik tak sawifiahna emaw engmah a la nei lo niin an sawi.
Congress party hian Zoramthanga’n finance department a enkawl hnu hian Mizoram sum leh pai dinhmun a chhe chak hle tih sawiin, sorkar hnathawkte hlawh puksak a ni a, a hun takah sorkar hnathawk nghetten hlawh la thei tawh loin, a nghet loa thawkte pawhin July 26, 2022 thengin hlawh an la dawng thei lo bawk a. Sorkar hnathawkte GPF hrensak an ni a, pension-ten pawisa chhuahpui tur rei tak an nghah a ngai a, contractor bill cheng vaibelchhe tam tak an pe thei lo a, health care bill la thei loin kum hnih vel zet kan awm ta bawk tih sawiin, “Hetiang hi thil awm dan a nih mek laiin Pu Zoramthanga lainate leh a thurualpui contractor-te chuan harsatna an tawk ve miah lo thung,” an ti.
“Tunah chuan kan leiba rulhna tura hmun dang atanga sum puk hial a lo ngai chho ta a, leiba thang (debt trap)-ah kan tang chho mek a ni. Tunah hi chuan Sri Lanka dinhmun aia kan dinhmun a that bikna tur a awm lo,” Congress party hian an ti bawk.