India khawchhak lam, Bihar-a district pariatah darkar 24 chhungin tekin mi 20 a deng hlum.
Bihar hmar lam huam chinah Nilaini leh Ningania ruah leh tek nasa tak thawk tura sawi lawk a ni bawk.
Bihar Chief Minister Nitish Kumar chuan mipuite chu an him theih nan sorkar disaster management authority-in khaw awm dan azira awm dan tur a tihte zawm turin a ngen.
Fur hun lai hian India-ah hian kum tin mi za chuang tek den hlum an awm thin.
Tekin mi a den hlum tam thin chhan ber pakhat chu khawvel hmun dangte ang lo takin India-ah hian pawn lama hnathawk an tam vang a ni a, tek tlak laia pawna awm hi a deng duh bik a ni.
Thawhlehni khan Kumar-a chuan tek den hlumte hi Rs. 4,00,00 theuhva ral an nih tur thu a sawi.
Chief minister hian kar hmasa khan state hotu liante thutkhawmpuiin sorkar in, sikul leh damdawi in zawng zawngah tek danna dah vek turin a ti tih The Times of India chanchinbu chuan a tar lang.
India hi khaw awm dan leh a ram awm dan avangin fur laia tek tlak duhna hmun a ni.
February khan BBC chuan tun hnai kumah hian India-ah hian tek a tla nasa zual tih a lo tar lang tawh.
Indian Institute of Tropical Meteorology pawhin kum 1995 leh 2014 inkar khan tek tla zat hi nasa takin a pung tih a sawi bawk.
India-ah hian April, 2020 leh March, 2021 chhungin tek vawi maktaduai 18 chuang a tla niin Climate Resilient Observing Systems Promotion Council chuan a sawi a. A hma kum chiaha hetih huna tla aiin 34%-in a tam zawk.