Aizawl : Health Deptt-in hun engemawchen kal tawh atangin social media-ah uchuak taka damdawi fakna hmuh a nih thin thu sawiin, hetianga damdawi fak hi dan khap thil a nih bakah, a hmangtu tana thil pawi tak thlen thei a nih avangin a theh darhtute umzuia na taka zilh tawh thin an nih thu an sawi.
Tunhnaiah pawh natna benvawn nei te tan leh thalaite duh zawng tur dam- dawi fakna uchuak leh diklo hmuh tur a la awm tih Health Deptt. chuan sawiin, an damdawi fakte nihphung zirchiannaah a pawi theihna buk a rit zawk thu an sawi a. ZMC-a ‘Adverse drugs reaction monitoring centre – pharmacovigilance cell’ in tunlaia damdawi an fakte hman avanga harsatna nei report tun hnaiah an dawn nual thu leh heng mite hi social media kaltlanga an hmuh Cherna/Ngona damdawi lo hmangtute an nih thu an sawi.
Heng damdawi lo hmang te insawiselna tlangpui chu - lungphu rang (tachycardia), taksa chauh ngawih ngawihna (fatigue), Chiaina (light headedness), Muthilh theih lohna (insomnia), Ning ngawih ngawiha awm (stress) leh Chawpai nuam lo (indigestion / bloating) te a nih thu Health Deptt. thuchhuah chuan a tarlang.
Health Deptt. thuchhuah chuan damdawi fakna darh mek - Lishou : Cher na Damdawi (Sibutram- ine), Ngona (Glutathione), Cindella Infusion, Thana (nerve) damdawi, etc. te chu doctor hriatpui loh leh sumdawnna thil mai a nh thu a tarlang a. A hmangtu tana thil pawi tak thlen thei a nih avangin tumahin heng thil hi ngaihven lo turin an ngen bawk.