India zalen kum 75-na champha lawmna pualin India rama district 773 ah kawlphetha kutpui hman tura ruahman a ni a, nimin khan hmun engemzawtah hman niin, Kolasibah chuan bialtu MLA, Minister of state ni bawk K. Lalrinliana hovin an hmang.
K. Lalrinliana chuan kawlphetha hnianghnar zawka hman tur siam chhuah kawngah India ram pum anga hmasawnna tam tak a awm rualin Mizoram pawhin hmasawnna hmel thar a hmuh ve zel thu a sawi a. Kolasib district-a Serlui B Hydel Project leh NEEPCO hnuaia Tuirial Hydel project atanga siam chhuah kawlphethate chu tangkai taka hman mek a nih thu a sawi.
Kolasib district chhungah sorkar hnuaia ‘Saubhaghya scheme’ kaltlangin a thlawna kawlphetha thlunzawmsak chhungkaw 1,839 an awm thu sawiin, Pangbalkawn leh Chhimluangah ni zung chakna hmanga tui lak a nih thu leh Meidumah pawh hmalak mek a nih thu K Lalrinliana chuan a sawi a. Kawlphetha inpek chhawnna changtlung zawk a awm theihna turin hmun hrang hrangah transformer tharte ruahman a nih thu leh ramri hrula police duty-na hmun te pawh chhit en a nih tawh thu a sawi.
Hmasawnna hna hrang hrang hmahruaitu zinga pawimawh tak chu kawphetha a nih thu K Lalrinliana chuan sawiin, hnianghnar zawka siam chhuah a nih theih nan leilung hausakna ti- chereu lo zawnga hmalak leh ni zung chakna hman tam a pawimawh thu a sawi a. Kawlphetha hmangtute chu ‘consumer’ an nih angin an chanvo humhalhna tur dan tha tak tak a awm thu a sawi bawk.
Nimin vek khan Lunglei-ah pawh kawlphetha kutpui hi Lunglei HPC Vice Chairman Lawmawma Tochhawng hova hman a ni a. Mamit-ah pawh District Bawrhsap Lalnunhlua hova he hun hi hman niin, Khawbungah hman a ni bawk a ni.