Chawlhkar eng emaw zat chhung Japanese khawpui pakhat tibuaitu zawng rual zinga pakhat chu manin tihhlum a ni tih thuneituten an puang.
Zawng chi khat, macaque an tihte hian Yamaguchi khawpuiah mi 50 dawn an hliam a ni.
Anmahni kaihruaitu deuh ber, a pa pakhat chu Thawhlehni zan khan anmahni pel tura a bik taka duanten high school tualah zimin an man a ni.
Kah muthilh a nih hnuah uluk zawka endik a ni a, khawpui tibuaia mi pawh hliamtu zinga mi ngei a ni tih an finfiah zui.
Chawlhkar thum liam ta atanga zawngin mihring, puitling pawh, naupang pawh, an beia an tina thin tih sawi a awm atangin thuneitute chuan an pel tan a. Hliam tuar tam zawk hi an taksa an hai pilhsak leh seh te an ni hlawm.
An puipa ber nia hriat hi that tawh mah se zawng chetna a la awm a, a dangte pawh zawn zui zel an ni tih agricultural department hotu pakhat chuan AFP a hrilh.
“A hmutute chuan zawngte hi an len zawng intiat lo zawng niin an sawi a, pakhat man a nih hnuah an chetna sawi a awm zui zel,” a ti.
An zawng man tawh hi kum li vela upa tur, metre chanve (1ft 7in) vela sang a ni.
Japanese macaque-te hi an ramah hian an tam hle a, hmun thenkhatah phei chuan thlai chinte an ei chhia a, ina luhte pawh an ching hle.
Hetih rual hian Yamaguchi khawpuia thleng ang, mihring an beih ang hi chu a tam lo hle.
Khawpui thuneitu pakhat chuan a puipa deuh ber an man hma lawk khan ‘hun reilo te kar dana hetiang zat chetna an neih ang hi chu a thleng ngai lo hle’ niin a sawi a ni.
“Mi an beih pawhin naupang leh hmeichhiate an ni tlangpui thin,” an ti a. “Tun hnaia mite erawh chuan tar leh mipa puitlingte pawh an bei a ni,” an ti bawk.
A hma pawhin heng zawngte hi man tumin thang kam a lo ni tawh a; mahse, an man thei lo va. July thla tir khan police patrol pawh tirh an ni a; mahse, an hlawhtling bik chuang lo.
An chetna an tar lan zingah hmeichhe naupang kum lo li mi chu an ina zawng lutin a bei a, a vun khawi khawi emaw lai pawh a thler a. Kindergarten classroom pakhatah an lut bawk.
Thawkkhat laia mang mai hlauhawm zinga mi, Japanese macaque-te hi tun hnaiah an tamin an pung chak hle a ni.
An tam tak em avang hian mihring nena buaina lian a awm ta fo niin Yamagata University-in a zir chiannaah hmuh a ni a. Mihring khawsak dan leh ram ngaw awm dan inthlak zel nghawng niin an sawi bawk.