Aizawl : Agriculture Minister C. Lalrinsanga’n video conference hmangin district agriculture officer leh block agricultural officer te chu nimin SEDP kaltlanga Vaimim thar sawngbawlna (post harvesting management) atana pawimawh a tih rona (drying process) chungchang a sawipui.
SEDP hnuaia district tina Vaimim thar beisei zat leh thar chhuah (production) tihralna leh marketing chungchang pawh Agriculture minister chuan district agriculture officer leh block agricultural officer te chu a sawipui a. DAO te chuan an district huam chhunga Vaimim thar te chu ran chaw siamna atana tihral theih an inrin thu an sawi vek a, a herna khawl (milll) pawh hmun thenkhata dah tura hmalak mek a nih thu an sawi.
Vaimim thar te chu AH & Vety department bakah Society emaw private entrepreneur ten an lei thin thu an sawi a. Vety feed mill ah kg 1 Rs 24-in quintal engemawzat pek theih an inbeisei thu an sawi bawk.